ആലുവ : ആശുപത്രിയില്‍ ചികിത്സയ്‌ക്കെത്തിയ അന്യസംസ്ഥാന തൊഴിലാളികളില്‍ നിന്നും കള്ളനോട്ട് പിടികൂടി. ഇന്നലെ ഉച്ചയോടെയാണ് ആലുവയിലെ ഒരു പ്രമുഖ സ്വകാര്യ ആശുപത്രിയില്‍ ചികിത്സ തേടിയെത്തിയ അന്യസംസ്ഥാനക്കാരില്‍ നിന്നും കള്ളനോട്ട് പിടികൂടിയത്.
ആലുവ ഭാഗത്ത് കൂലിവേല ചെയ്യുന്ന റോസക്ക് എന്ന അന്യസംസ്ഥാനക്കാരനാണ് ഇന്നലെ പനിമൂലം ആശുപത്രിയിലെത്തിയത്. ഇയാളെ ചികിത്സയ്ക്കുന്നതിനിടയില്‍ ആശുപത്രയിലെ കൗണ്ടറില്‍ രജിസ്‌ട്രേഷന്‍ ചീട്ട് എടുക്കുന്നതിനായി ഇയാള്‍ക്കൊപ്പമുണ്ടായിരുന്ന രണ്ടുപേരില്‍ ഒരാള്‍ 50 രൂപയുടെ 3 നോട്ടുകള്‍ നല്‍കി. എന്നാല്‍ ആശുപത്രിയിലെ വനിതാ സ്റ്റാഫിന് നോട്ടുകളില്‍ സംശയം തോന്നിയതിനെ തുടര്‍ന്ന് ആലുവ പൊലീസിന് വിവരം നല്‍കുകയായിരുന്നു.
സ്ഥലത്തെത്തിയ പൊലിസ് നടത്തിയ പ്രാഥമിക പരിശോധനയില്‍ ചികിത്സ തേടിയെത്തിയ ആളില്‍ നിന്ന് 50 രൂപയുടെ 20 കള്ളനോട്ടുകളും കൂടെയുണ്ടായിരുന്നവരില്‍ നിന്നും 25-ലധികം 50 രൂപാ നോട്ടുകളും കണ്ടെടുത്തിട്ടുണ്ട്.
നോട്ടുകള്‍ തങ്ങള്‍ക്ക് തങ്ങളുടെ തൊഴിലുടമ ശമ്പളമായി തന്നതാണെന്നാണ് അന്യസംസ്ഥാനക്കാരുടെ വാദം. റോസക്ക് യു.സി. കോളേജ് ആലുവ എന്ന വിലാസമാണ് ഇവര്‍ ആശുപത്രിയില്‍ നല്‍കിയിരുന്നത്.
സംഭവുമായി ബന്ധപ്പെട്ട് മൂന്ന് പേരെയും ആലുവ പൊലീസ് കസ്റ്റഡിയിലെടുത്ത് വിശദമായി ചോദ്യം ചെയ്തു വരികയാണ്. ഇവര്‍ നല്‍കിയ വിവരങ്ങള്‍ അനുസരിച്ച് ഇവര്‍ ജോലി ചെയ്ത സ്ഥാപന ഉടമയെയും പൊലീസ് ചോദ്യം ചെയ്യുന്നുണ്ട്.
ഇത്തരത്തില്‍ നേരത്തേയും ആലുവ കേന്ദ്രീകരിച്ച് അന്യസംസ്ഥാനക്കാരില്‍ നിന്നും കള്ളനോട്ട് പിടികൂടിയിരുന്നു. ഈ കേസില്‍ വ്യാപകമായി കള്ളനോട്ട് സംഘങ്ങളെക്കുറിച്ചുള്ള ഞെട്ടിപ്പിക്കുന്ന വിവരങ്ങളായിരുന്നു പൊലീസിന് ലഭിച്ചിരുന്നത്.