നിലമ്പൂര്‍: പൊലിസും സംയുക്ത ഓട്ടോ തൊഴിലാളി കോ-ഓര്‍ഡിനേഷന്‍ കമ്മിറ്റിയും നടപ്പാക്കിയ ഓട്ടോറിക്ഷാ ഓണ്‍ലൈന്‍ സംവിധാനം നിലവില്‍ വന്നതോടെ വ്യാജന്‍മാര്‍ നഗരസഭ പരിധിക്കു പുറത്തായി. പെര്‍മിറ്റ്, ഇന്‍ഷൂറന്‍സ്, ലൈസന്‍സ് എന്നിവ ഇല്ലാത്ത ഓട്ടോകളാണു നഗരത്തില്‍ നിന്നും അപ്രത്യക്ഷമായത്.
ഡ്രൈവറുടെ ലൈസന്‍സ് ഉള്‍പ്പെടെ എല്ലാവിധ രേഖകളും ഉള്ള ഓട്ടോകളാണു വെബ്‌സൈറ്റില്‍ രജിസ്റ്റര്‍ ചെയ്തിട്ടുള്ളത്. പരിശോധനക്കു ശേഷം ചെക്ക്ഡ് എന്ന സ്റ്റിക്കറും നമ്പറും നല്‍കിയിട്ടുണ്ട്. ഇത്തരത്തില്‍ നമ്പര്‍ ഇല്ലാത്ത വാഹനങ്ങള്‍ക്കെതിരേ ശക്തമായ നടപടി കൈക്കൊള്ളുമെന്നു പൊലിസ് വ്യക്തമാക്കിയ സാഹചര്യത്തിലാണു രേഖകള്‍ ഇല്ലാതെ ഓടിയിരുന്ന ഓട്ടോകള്‍ നഗരത്തില്‍ നിന്നും അപ്രത്യക്ഷമായത്. നഗരത്തില്‍ 800 ഓളം ഓട്ടോകളാണ് ഉള്ളത്. ഇതില്‍ 400 ഓട്ടോകള്‍ക്കാണ് നമ്പര്‍ ലഭിച്ചിട്ടുള്ളത്. യാത്രക്കാരുടെയും ഓട്ടോ ഡ്രൈവര്‍മാരുടെയും സുരക്ഷ മുന്‍നിര്‍ത്തിയാണു പൊലിസ് ഇത്തരത്തിലുള്ള സംവിധാനത്തിനു രൂപം നല്‍കിയത്.