ദോഹ: ലോകത്തിലെ ഏറ്റവും മികച്ച ദ്വീപുകളിലൊന്നായി ഖത്തറിന്റെ പര്‍പ്പിള്‍ ഐലന്‍ഡ്. ഗ്ലോബല്‍ ട്രാവല്‍ സൈറ്റായ ബിഗ് 7 ട്രാവല്‍ പ്രസിദ്ധീകരിച്ച ലോകത്തിലെ മികച്ച 50 ഐലന്‍ഡുകളുടെ പട്ടികയിലാണ് പര്‍പ്പിള്‍ ഐലന്‍ഡും ഇടം നേടിയത്.

അല്‍ഖോറില്‍ സ്ഥിതി ചെയ്യുന്ന പര്‍പ്പിള്‍ ഐലന്‍ഡിനെ കൗതുകകരമായ ചരിത്രമുള്ള ദ്വീപ് എന്നാണ് പട്ടികയില്‍ വിശേഷിപ്പിച്ചിരിക്കുന്നത്. ബഹ്‌റൈനുമായുള്ള വ്യാപാരത്തിനായി മീന്‍പിടിത്തക്കാരും മുത്തുവാരല്‍ വിദഗ്ധരും 2000 ബി.സി. മുതല്‍ക്കെ ഉപയോഗിച്ചിരുന്ന ദ്വീപാണിത്.

കണ്ടല്‍ കാടുകള്‍ കൊണ്ട് സമ്പുഷ്ടമാണ് ഇവിടം. പരിസ്ഥിതി സംരക്ഷണ പ്രവര്‍ത്തനങ്ങളും ഇവിടെ സജീവമായി തന്നെ നടക്കുന്നുണ്ട്. ഏതാനും വര്‍ഷങ്ങള്‍ക്ക് മുന്‍പ് ദ്വീപില്‍ സന്ദര്‍ശകര്‍ക്കായി മേല്‍പാലം നിര്‍മിക്കുകയും ചെയ്തിരുന്നു.