പത്തനംതിട്ട: പേവിഷബാധയേറ്റ് മരിച്ച അഭിരാമിയുടെ മൃതദേഹം സംസ്‌കരിച്ചു. റാന്നിയിലെ സ്വകാര്യ ആശുപത്രിയിലെ മോര്‍ച്ചറിയില്‍ സൂക്ഷിച്ചിരുന്ന മൃതദേഹം രാവിലെ 9 മണിക്കാണ് വീട്ടിലെത്തിച്ചത്. 12 മണിയോടെ് സംസ്‌കാര ചടങ്ങുകള്‍ നടന്നു.

തെരുവ് നായയുടെ കടിയേറ്റ അഭിരാമിയുടെ ചികിത്സയില്‍ പിഴവുണ്ടായതായി എന്ന ആരോപണത്തില്‍ ഉറച്ച് നില്‍ക്കുകയാണ് കുടുംബം. ജനറല്‍ ആശുപത്രിയില്‍ എത്തിച്ച കുട്ടിയെ ഒരു മണിക്കൂര്‍ നിരീക്ഷണത്തില്‍ ആക്കിയതിന് ശേഷമാണ് പ്രതിരോധ വാക്‌സിന്‍ നല്‍കിയതെന്നാണ് അമ്മ രജനി ആരോപിക്കുന്നത്. ഓഗസ്റ്റ് 14-ന് രാവിലെയാണ് കുട്ടിക്ക് തെരുവു നായയുടെ കടിയേറ്റത്. ഇതേതുടര്‍ന്ന് ആദ്യം പെരുനാട് കുടുംബാരോഗ്യ കേന്ദ്രത്തില്‍ എത്തിച്ചെങ്കിലും ഡോക്ടര്‍മാരടക്കം ആരും ആശുപത്രിയില്‍ ഇല്ലാതിരുന്നതിനാല്‍ ഒരു മണിക്കൂര്‍ കൊണ്ട് പത്തനംതിട്ട ജനറല്‍ ആശുപത്രിയില്‍ കുട്ടിയെ എത്തിക്കുകയായിരുന്നു. എന്നാല്‍ അവിടെയും സമാന അനുഭവം തന്നെയായിരുന്നുവെന്നും പേവിഷ ബാധയുള്ള ജന്തുക്കളുടെ കടിയേറ്റാല്‍ അതിവേഗത്തില്‍ നല്‍കേണ്ട ഇമ്മ്യൂണോ ഗ്ലോബുലിന്‍ അഭിരാമിക്ക് വൈകിയാണ് നല്‍കിയതെന്നുമാണ് അമ്മ രജനി ആരോപിക്കുന്നത്.