സ്വന്തം ലേഖകന്‍
തിരുവനന്തപുരം: കൊവിഡ് വ്യാപനത്തില്‍ ആശ്വാസകരമായ സൂചന നല്‍കിയ ടെസ്റ്റ് പോസിറ്റിവിറ്റി കണക്കുകള്‍ ഒരാഴ്ചയ്ക്കിടെ മാറിമറിഞ്ഞു. ശരാശരി ടെസ്റ്റ് പോസിറ്റിവിറ്റി നിരക്ക് ആറു ശതമാനത്തില്‍ താഴെയുള്ള എ കാറ്റഗറിയില്‍ ഉള്‍പ്പെടുന്ന തദ്ദേശ സ്ഥാപനങ്ങളുടെ എണ്ണം പകുതിയായി കുറഞ്ഞു.
കഴിഞ്ഞ 23ന് സംസ്ഥാന ദുരന്ത നിവാരണ അതോറിറ്റി പുറത്തിറക്കിയ ലിസ്റ്റില്‍ 313 തദ്ദേശ സ്ഥാപനങ്ങളായിരുന്നു എ കാറ്റഗറിയിലുണ്ടായിരുന്നത്. എന്നാല്‍ ജൂണ്‍ 30ന് പുറത്തിറക്കിയ ലിസ്റ്റില്‍ 143 സ്ഥാപനങ്ങള്‍ മാത്രമാണ് ഉള്‍പ്പെട്ടത്.

കൊവിഡ് വ്യാപനം അതിതീവ്രമാണെന്ന് സൂചിപ്പിക്കുന്ന ഡി കാറ്റഗറിയിലെ എണ്ണം കൂടുകയും ചെയ്തിട്ടുണ്ട്. പുതിയ ലിസ്റ്റില്‍ 88 സ്ഥാപനങ്ങളാണ് ഡി കാറ്റഗറിയിലുള്ളത്. കഴിഞ്ഞ ലിസ്റ്റില്‍ അത് 24 മാത്രമായിരുന്നു. കൊവിഡ് വ്യാപനം കൂടുതലാണെന്നു സൂചിപ്പിക്കുന്ന സി കാറ്റഗറിയിലും (ടെസ്റ്റ് പോസിറ്റിവിറ്റി 12നും 18നുമിടയില്‍) വര്‍ധനവുണ്ടായി. കഴിഞ്ഞ ലിസ്റ്റില്‍ 152 ആയിരുന്നത് ഇപ്പോള്‍ 293 ആയാണ് വര്‍ധിച്ചത്. നിലവില്‍ ഡി കാറ്റഗറിയില്‍ മുന്‍പന്തിയില്‍ പാലക്കാട് ജില്ലയാണ്. 22 തദ്ദേശസ്ഥാപനങ്ങളാണ് ഡി കാറ്റഗറിയിലുള്ളത്.
തിരുവനന്തപുരം (13), കൊല്ലം (6), പത്തനംതിട്ട (4), ആലപ്പുഴ (2), കോട്ടയം (1), ഇടുക്കി (2), എറണാകുളം (8), തൃശൂര്‍ (2), മലപ്പുറം (12), കോഴിക്കോട് (2), വയനാട് (2), കണ്ണൂര്‍ (4), കാസര്‍കോട് (8) എന്നിങ്ങനെയാണ് മറ്റു ജില്ലകളിലെ ഡി കാറ്റഗറിയുടെ എണ്ണം.