മേപ്പാടി: മൂന്ന് പഞ്ചായത്തുകളിലെ മുഴുവന്‍ വീടുകളിലും കുടിവെള്ളം എത്തിക്കുകയെന്ന ലക്ഷ്യവുമായി ആവിഷ്‌കരിച്ച കാരാപ്പുഴ സമഗ്ര കുടിവെള്ള പദ്ധതിയുടെ പ്രാരംഭഘട്ട നിര്‍മാണ പ്രവൃത്തികള്‍ തുടങ്ങി. മേപ്പാടി പഞ്ചായത്തിലെ മൂന്നാം വാര്‍ഡില്‍ ഉള്‍പെടുന്ന നത്തംകുനിയിലാണ് കിണര്‍ നിര്‍മാണം തുടങ്ങിയത്.
കാരാപ്പുഴ പദ്ധതി പ്രദേശത്താണ് കിണര്‍ കുഴിക്കുന്നത്. ശുചീകരണ പ്ലാന്റ് സ്ഥാപിക്കുന്നതിലെ അനിശ്ചിതത്വങ്ങളാണ് പദ്ധതി ഇത്രയും വൈകാന്‍ പ്രധാന കാരണം. പൂത്തകൊല്ലി എസ്റ്റേറ്റിലാണ് പ്ലാന്റ് സ്ഥാപിക്കാന്‍ ഭൂമി കണ്ടെത്തിയത്. എന്നാല്‍ ഭൂമിയേറ്റെടുക്കുന്നതിലുള്ള നിയമ തടസങ്ങള്‍ പദ്ധതിയെ ബാധിക്കുകയായിരുന്നു. ഇതോടെ അനുയോജ്യമായ മറ്റൊരു സ്ഥലം കണ്ടെത്താന്‍ അടിയന്തര നീക്കങ്ങള്‍ ആരംഭിച്ചിട്ടുണ്ട്. വൈത്തിരി, മൂപ്പൈനാട്, മേപ്പാടി എന്നീ മൂന്ന് പഞ്ചായത്തുകളിലേക്കാണ് പദ്ധതി പ്രകാരം കുടിവെള്ളമെത്തുക. ഓരോ വേനലിലും വരള്‍ച്ച കൂടുതല്‍ ശക്തമാകുന്ന സാഹചര്യത്തില്‍ യുദ്ധകാലാടിസ്ഥാനത്തില്‍ പദ്ധതി പ്രവര്‍ത്തനം പൂര്‍ത്തിയാക്കാനാണ് അധികൃതരുടെ തീരുമാനം.