കായംകുളം : മലങ്കര കത്തോലിക്കാ സഭ മാവേലിക്കര രൂപതയുടെ സാമൂഹ്യ ക്ഷേമ വിഭാഗമായ ചേതന സൊസൈറ്റിയുടെ ഒന്‍പതാം വാര്‍ഷിക സമ്മേളനവും കര്‍ഷക സമൃദ്ധി അവാര്‍ഡ് വിതരണവും കായംകുളം ചേതനയില്‍ വച്ച് നടന്നു.
ജില്ലാ പഞ്ചായത്ത് ഉപാധ്യക്ഷ ദലീമ ജോജോ വാര്‍ഷിക സമ്മേളനം ഉദ്ഘാടനം ചെയ്തു. മാവേലിക്കര രൂപതാധ്യക്ഷന്‍ ബിഷപ്പ് ഡോ. ജോഷ്വാ മാര്‍ ഇഗ്‌നാത്തിയോസ് അധ്യക്ഷത വഹിച്ചു. ചേതന സമൃദ്ധി നാലാം ഘട്ട ഉദ്ഘാടനം നഗരസഭാ സ്റ്റാന്റിങ് കമ്മിറ്റി ചെയര്‍പേഴ്‌സണ്‍ ഷീബാദാസ് ഉദ്ഘാടനം ചെയ്തു. മികച്ച കര്‍ഷകയ്ക്കുള്ള കര്‍ഷക സമൃദ്ധി അവാര്‍ഡ് പുന്തല യൂണിറ്റിലെ സതീഭായി ശശീന്ദ്രന് ബിഷപ്പ് ഡോ. ജോഷ്വാ മാര്‍ ഇഗ്‌നാത്തിയോസ് സമ്മാനിച്ചു. അവയവദാനം നടത്തി മാതൃകയായ ലേഖ നമ്പൂതിരിയെ ചടങ്ങില്‍ ആദരിച്ചു. എ പ്ലസ് വാങ്ങിയ വിദ്യര്‍ഥികളെയും ചടങ്ങില്‍ പുരസ്‌ക്കാരം നല്‍കി അനുമോദിച്ചു. ചേതന ഡയറക്ടര്‍ ഫാ. ബിന്നി നെടുംപുറത്ത്, നഗരസഭാ കൗണ്‍സിലര്‍ ഡി അശ്വനിദേവ് , ബ്ലഡ് ഡൊണേഷന്‍ സെല്‍ ചെയര്‍മാന്‍ മുഹമ്മദ് ഷമീര്‍, ഫാ ജോര്‍ജ് കോട്ടപ്പുറം, ഫാ ലൂക്കോസ് കന്നിമേല്‍ സംസാരിച്ചു.