ലണ്ടന്‍: സ്വന്തം മൈതാനമായ വെംബ്ലിയില്‍ കിരീടവരള്‍ച്ചയ്ക്ക് വിരാമമിടാനുള്ള ഇംഗ്ലണ്ടിന്റെ ആഗ്രഹം സഫലമായില്ല. പെനാല്‍റ്റി ഷൂട്ടൗട്ടിലേക്ക് നീണ്ട ഫൈനലില്‍ ഇംഗ്ലണ്ടിനെ പരാജയപ്പെടുത്തി ഇറ്റലി കിരീടം നേടി. ഇറ്റലിയുടെ രണ്ടാം കിരീടനേട്ടമാണിത്. മുന്‍പ് 1968ലാണ് ഇറ്റലി യൂറോ കപ്പ് കിരീടം ചൂടിയത്. ഷൂട്ടൗട്ടില്‍ ഇറ്റലിക്കായി ബെറാര്‍ഡി, ബൊനൂച്ചി, ബെര്‍ണാദേശി എന്നിവര്‍ ലക്ഷ്യം കണ്ടു. ഹാരി കെയ്ന്‍, ഹാരി മഗ്വെയര്‍ എന്നിവര്‍ക്ക് മാത്രമേ ഇംഗ്ലണ്ടിനു വേണ്ടി കിക്ക് ലക്ഷ്യത്തിലെത്തിക്കാനായുള്ളൂ. നിശ്ചിത സമയത്തും അധിക സമയത്തും സ്‌കോര്‍ 1-1ല്‍ അവസാനിച്ചിരുന്നു.

ഇംഗ്ലണ്ടിന്റെ സ്വന്തം തട്ടകത്ത് ആതിഥേയരെ മറികടന്ന് ഇറ്റലിക്കായിരുന്നു മത്സരത്തിലെ ആധിപത്യം. എന്നാല്‍ മത്സരം തുടങ്ങി രണ്ടാം മിനുട്ടില്‍ തന്നെ പ്രതിരോധ താരം ലൂക്ക് ഷോ ഇംഗ്ലണ്ടിന്റെ അക്കൗണ്ട് തുറന്നു. യൂറോ കപ്പ് ഫൈനലിലെ ഏറ്റവും വേഗതയേറിയ ഗോളാണിത്. കീറന്‍ ട്രിപ്പിയര്‍ ഇംഗ്ലണ്ട് ബോക്‌സിനുള്ളിലേക്ക് നല്‍കിയ പാസ് അനായാസം ലൂക്ക് ഷോ ഇറ്റലിയുടെ വലയിലെത്തിക്കുകയായിരുന്നു. തുടര്‍ന്ന് ഇരുടീമും ആക്രമണ പ്രത്യാക്രമണങ്ങള്‍ നടത്തിയെങ്കിലും ഗോള്‍ അകന്നു. 34ാം മിനുട്ടില്‍ ഫെഡറിക്കോ ചിയേസ മികച്ചൊരു ഷോട്ട് ഉതിര്‍ത്തെങ്കിലും പോസ്റ്റിന് തൊട്ടുരുമി പുറത്തേക്ക് പോയി.

രണ്ടാം പകുതിയിലെ 62ാം മിനുട്ടില്‍ ഫെഡറിക്കോ ചിയേസയുടെ ഗോളെന്നുറച്ച ഷോട്ട് ഇംഗ്ലണ്ട് ഗോളി പിക്ക്‌ഫോര്‍ഡ് തടുത്തു. 67ാം മിനുട്ടില്‍ സെറ്റ് പീസില്‍നിന്ന് റീബൗണ്ടിലൂടെയെത്തിയ പന്ത് ബൊനൂച്ചി ലക്ഷ്യത്തിലെത്തിച്ചു ഇറ്റലി ഒപ്പമെത്തി. തുടര്‍ന്ന് ഗോളുകളൊന്നും പിറക്കാതിരുന്നതോടെ മത്സരം അധിക സമയത്തേക്ക് നീണ്ടു. അധിക സമയത്തും ഇരു ഗോള്‍ പോസ്റ്റുകളിലും ഇറ്റലിയും ഇംഗ്ലണ്ടും ഇരമ്പിയാര്‍ത്തെങ്കിലും ഗോള്‍ മാത്രം വീണില്ല. ഇതോടെയാണ് മത്സരം പെനാല്‍റ്റി ഷൂട്ടൗട്ടില്‍ കലാശിച്ചത്.