കൊച്ചി • സിൽവർ ലൈൻ പദ്ധതിയുടെ ഡി.പി.ആറിന് കേന്ദ്രത്തിന്റെ അനുമതി ഇല്ലെന്നിരിക്കെ സാമൂഹികാഘാത പഠനം നടത്തിയതിൽ സർക്കാരിന് ഹൈക്കോടതിയുടെ വിമർശനം. സിൽവർ ലൈൻ നിർദിഷ്ട പദ്ധതി മാത്രമാണെന്ന് കോടതി വ്യക്തമാക്കി. ഇതിനെതിരെയുള്ള ഹരജികൾ ജസ്റ്റിസ് ദേവൻ രാമചന്ദ്രൻ തീർപ്പാക്കി.
പദ്ധതിയുടെ ഡി.പി.ആറിന് കേന്ദ്രത്തിന്റെ അനുമതി ഇല്ലെന്നിരിക്കെ സാമൂഹികാഘാത പഠനം നടത്തിയിട്ട് എന്തു ഗുണമെന്നായിരുന്നു ഹൈക്കോടതിയുടെ ചോദ്യം. ഇത്രയധികം പണം ചെലവാക്കിയ പദ്ധതി എവിടെ എത്തി. കേന്ദ്രത്തിന് താൽപ്പര്യമില്ലെന്ന് അറിയിച്ചു കഴിഞ്ഞു. ഇത്രയധികം പ്രശ്‌നങ്ങൾ ഉണ്ടാക്കിയതിന് ആര് സമാധാനം പറയുമെന്നും കോടതി ചോദിച്ചു. ഇല്ലാത്ത പദ്ധതിക്ക് വേണ്ടിയാണോ ഇതൊക്കെ നടക്കുന്നതെന്നെന്ന് ചോദിച്ച കോടതി ചില ഉദ്യോഗസ്ഥർ നാടകം കളിക്കുകയാണന്നും കുറ്റപ്പെടുത്തി.
ഒരു പേര് വിളിച്ചാൽ പദ്ധതിയാകില്ല. ഇതുവരെ സാമൂഹികാഘാത പഠനം സംബന്ധിച്ച് വിജ്ഞാപനം ഇറക്കിയിട്ടില്ല. ഈ സാഹചര്യത്തിൽ നിലവിലെ ഹരജികൾ ഹൈക്കോടതി തീർപ്പാക്കി.
സിൽവർ ലൈൻ പ്രതിഷേധക്കാർക്കെതിരേ എടുത്ത കേസുകൾ പിൻവലിക്കാനാവില്ലെന്ന് സർക്കാർ അറിയിച്ചു. മറ്റു പല കേസുകളും പിൻവലിക്കുന്നുണ്ടല്ലോയെന്ന് കോടതി ചോദിച്ചു. കേസ് പിൻവലിച്ചാൽ ഒരു പരിധിവരെ സമാധനമായേക്കാം. പക്ഷേ സർക്കാർ അതു ചെയ്യുന്നില്ലെന്നും കോടതി പറഞ്ഞു.