ദുബൈ ലൈസൻസ് നേടാൻ വീണ്ടും 'ഗോൾഡൻ ചാൻസ്'; സമയവും പണവും അധ്വാനവും ലാഭിക്കാം

ദുബൈ: ദുബൈ ലൈസൻസ് നേടാൻ ആഗ്രഹിക്കുന്നവർക്കായുള്ള 'ഗോൾഡൻ ചാൻസ്' വീണ്ടും തുറന്ന് ദുബൈ റോഡ്സ് ആൻഡ് ട്രാൻസ്പോർട് അതോറിറ്റി(ആർ.ടി.എ). ലൈറ്റ് വെഹിക്കിൾ ഡ്രൈവിങ് ലൈസൻസ് സ്വന്തമാക്കാൻ ആഗ്രഹിക്കുന്നവർക്കാണ് ഇതുവഴി എളുപ്പത്തിൽ ലൈസൻസ് നേടാനാവുക. ഇന്ത്യക്കാർക്ക് ഉൾപ്പെടെ ആകെ 40 40 വിദേശ രാജ്യങ്ങളുടെ ഡ്രൈവിങ് ലൈസൻസുള്ളവർക്ക് 'ഗോൾഡൻ ചാൻസ്' പദ്ധതി വഴി ലൈസൻസ് നേടാം.

നേരത്തെ നടപ്പിക്കിയിരുന്ന പദ്ധതി ഇടക്കാലത്ത് നിർത്തിവെച്ചിരുന്നു. ഇതാണ് ഇപ്പോൾ വീണ്ടും തുടങ്ങിയത്. ദുബൈ റോഡ്സ് ആൻഡ് ട്രാൻസ്പോർട് അതോറിറ്റിയുടെ ഡയറക്ട് ടെസ്റ്റ് പദ്ധതിയാണ് 'ഗോൾഡൻ ചാൻസ്'.

എങ്ങിനെ ഗോൾഡൻ ചാൻസ് വഴി ലൈസൻസ് നേടാം

* ആദ്യം നിങ്ങളുടെ പേരിലുള്ള ഒരു ഫയൽ ഓപ്പൺ ചെയ്യുകയാണ് വേണ്ടത്.

* https://www.rta.ae/wps/portal/rta/ae/home/rta-services/service-details?serviceId=3704306 എന്ന ലിങ്കിൽ കയറി ഫയൽ ഓപ്പൺ ചെയ്യാം.

* 2,150 ദിർഹം അടച്ചാണ് ഫയൽ ഓപ്പൺ ചെയ്യേണ്ടത്. ഫയൽ ഓപ്പണിങ് ഫീസ്, തിയറി ടെസ്റ്റ്, നേത്ര പരിശോധന, റോഡ് ടെസ്റ്റ്, ലൈസൻസ് ഫീസ് എന്നിവയ്ക്ക് അടക്കമുള്ളതാണ് 2,150 ദിർഹം.

* ശേഷം തിയറി ടെസ്റ്റിനെ അഭിമുഖീകരിക്കുക. തിയറി ടെസ്റ്റിനുള്ള കോൾ നിങ്ങൾക്ക് വരും.

* ഇത് പാസായാൽ നേരിട്ട് റോഡ് ടെസ്റ്റിന് വിധേയമാകാം.

ശ്രദ്ധിക്കേണ്ട കാര്യം, സ്വന്തം രാജ്യത്തെ ലൈസൻസ് ഉള്ളവർക്ക് മാത്രമാണ് ഇങ്ങനെ അപേക്ഷിക്കാൻ സാധിക്കുക. അതേസമയം, ഗോൾഡൻ ചാൻസ് റോഡ് ടെസ്റ്റിൽ പരാജയപ്പെടുകയാണെങ്കിൽ സാധാരണ പോലെ ഡ്രൈവിങ് ക്ലാസിൽ ചേർന്ന് പഠിക്കേണ്ടി വരും. എന്നാൽ ഇതിന് പ്രത്യേക ഫീസ് അടയ്ക്കേണ്ടതില്ല.

ഗോൾഡൻ ചാൻസ് യുഎഇയിൽ ഡ്രൈവിംഗ് ജോലിക്കും മറ്റും വരുന്നവർക്കുള്ള മികച്ച അവസരമാണ്. കുറഞ്ഞ പണത്തിന് എളുപ്പത്തിൽ ലൈസൻസ് നേടാൻ സാധിക്കും. സാധാരണ നിലയിൽ ലൈസൻസ് നേടാൻ കുറഞ്ഞത് 5,000 ദിർഹമെങ്കിലും ചെലവ് വരുന്നിടത്താണ് ഇപ്പോൾ അതിന്റെ പകുതി മാത്രം അടച്ച് ലൈസൻസ് എടുക്കാൻ അവസരമുള്ളത്. പണത്തിനു പുറമെ സാധാരണഗതിയിൽ ഏറെ സമയനഷ്ടവും അധ്വാനവും ആവശ്യമാണ് ലൈസൻസ് ലഭിക്കാൻ.