അഹമ്മദാബാദ് • ദേശീയ ഗെയിംസ് ഫുട്‌ബോള്‍ ഫൈനലില്‍ കേരളത്തിന് ദയനീയ തോല്‍വി. ട്രാന്‍സ് സ്റ്റേഡിയയില്‍ നടന്ന മത്സരത്തില്‍ എതിരില്ലാത്ത അഞ്ചു ഗോളിന് ബംഗാളാണ് കേരളത്തെ പരാജയപ്പെടുത്തിയത്. മത്സരത്തിന്റെ തുടക്കം മുതല്‍ കേരളത്തിന് ഗോള്‍ നേടാനായി മികച്ച അവസരങ്ങള്‍ ലഭിച്ചു. എന്നാല്‍ പല അസവരങ്ങളും മുതലാക്കാന്‍ കഴിഞ്ഞില്ല.

16ാം മിനുട്ടിലാണ് ബംഗാള്‍ അക്കൌണ്ട് തുറന്നത്. ബംഗാള്‍ താരം തൊടുത്ത ഷോട്ട് ഗോള്‍കീപ്പര്‍ മിഥുന്റെ കയ്യില്‍ തട്ടിത്തെറിച്ചെങ്കിലും റീബൗണ്ട് വന്ന പന്തിനെ റോബി ഹന്‍സ്ഡ വലയിലെത്തിച്ചു. സ്‌കോര്‍ 1-0. ഗോള്‍ മടക്കാനായി കേരളത്തിന് പല തുറന്ന അവസരങ്ങളും ലഭിച്ചെങ്കിലും ഭാഗ്യം തുണച്ചില്ല. 30ാം മിനുട്ടില്‍ ഹരി ശ്രെസ്ത ബംഗാളിനായി രണ്ടാം ഗോള്‍ നേടി. രണ്ട് ഗോള്‍ വഴങ്ങിയെങ്കിലും കേരളം മികച്ച നീക്കങ്ങളുമായി കളം നിറഞ്ഞു. എന്നാല്‍ ഫിനിഷിങ്ങിലെ പോരായ്മ തിരിച്ചടിയാവുകയായിരുന്നു. ആദ്യ പകുതിയുടെ അധിക സമയത്ത് ശ്രെസ്ത വീണ്ടും ഗോള്‍ നേടി ബംഗാളിന് മൂന്ന് ഗോളിന്റെ ലീഡ് സമ്മാനിച്ചു. രണ്ടാം പകുതിയില്‍ ആശ്വാസ ഗോളിനായി കേരളം ശ്രമിക്കുന്നതിനിടെ52ാം മിനുട്ടിൽ ബംഗാളിന്റെ നാലാം ഗോളും ശ്രെസ്തയുടെ ഹാട്രികും പിറന്നു. 86ാം മിനുട്ടില്‍ അമിത് ചക്രബര്‍ത്തിയും ബംഗാളിനായി ഗോള്‍ നേടിയതോടെ 5-0 എന്ന സ്‌കോറിന് കേരളം ബംഗാളിന് മുന്നില്‍ അടിയറവ് പറഞ്ഞു. ഇതോടെ സന്തോഷ് ട്രോഫി ഫൈനലില്‍ ഏറ്റ തോല്‍വിക്ക് മധുരപ്രതികാരം ചെയ്യാന്‍ ബംഗാളിന് കഴിഞ്ഞു.