ഹരിയാനയില്‍ 3 സ്ത്രീകളെ കൂട്ടബലാത്സംഗം ചെയ്തു; അക്രമം കുടുംബത്തെ ബന്ദിയാക്കിയ ശേഷം

ചണ്ഡിഗഢ്: ഹരിയാനയിലെ പാനിപ്പത്തില്‍ മൂന്ന് സ്ത്രീകളെ കൂട്ടബലാത്സംഗത്തിന് ഇരയാക്കിയതായി റിപ്പോര്‍ട്ട്. ഭര്‍ത്താക്കന്മാരുടേയും കുട്ടികളുടേയും മുന്നില്‍വെച്ചാണ് ഇവര്‍ ബലാത്സംഗത്തിനിരയാക്കപ്പെട്ടത്. വ്യാഴാഴ്ച്ച പുലര്‍ച്ചെ ഒരു മണിക്കാണ് സംഭവം.

അതിക്രമം നടത്തിയത് നാല് പേരടങ്ങുന്ന സംഘമാണെന്നാണ് വിവരം. കുടുംബാംഗങ്ങളെ ബന്ദികളാക്കിയ ശേഷമായിരുന്നു ഈ സംഘം സ്ത്രീകളെ കൂട്ടബലാത്സംഗം ചെയ്തത്.മുഖംമൂടി ധരിച്ചെത്തിയ സംഘം കത്തിയും തോക്കുമായി വീട്ടിലേക്ക് അതിക്രമിച്ച് കയറി ആക്രമിക്കുകയായിരുന്നു. 24,25,35 വയസുള്ള സ്ത്രീകളാണ് ആക്രമിക്കപ്പെട്ടത്. ഇതിനു ശേഷം വീട്ടില്‍ നിന്ന് പണവും സ്വര്‍ണാഭരണങ്ങളും ഉള്‍പ്പെടെ മോഷ്ടിച്ചാണ് സംഘം രക്ഷപ്പെട്ടത്.

സംഭവത്തില്‍ പൊലിസ് അന്വേഷണം ആരംഭിച്ചിട്ടുണ്ട്. ഫോറന്‍സിക് സംഘവും സ്ഥലം സന്ദര്‍ശിച്ച് തെളിവ് ശേഖരിച്ചു.