ബി.ജെ.പി എം.പി തീവ്രവാദിയെന്ന് അധിക്ഷേപിച്ച ഡാനിഷ് അലിയെ കണ്ട് രാഹുല്‍ ഗാന്ധി

ന്യൂഡല്‍ഹി: ബി.ജെ.പി എം.പി രമേശ് ബിധുരി തീവ്രവാദിയെന്ന് വിളിച്ച് അധിക്ഷേപിച്ച ബി.എസ്.പി എം.പി ഡാനിഷ് അലിയെ കണ്ട് കോണ്‍ഗ്രസ് നേതാവ് രാഹുല്‍ ഗാന്ധി. എ.ഐ.സി.സി ജനറല്‍ സെക്രട്ടറി കെ.സി വേണുഗോപാലിനൊപ്പമാണ് രാഹുലെത്തിയത്. കൂടിക്കാഴ്ചക്ക് ശേഷം വെറുപ്പിന്റെ കമ്പോളത്തില്‍ സ്‌നേഹത്തിന്റെ കട തുറക്കുമെന്ന് മാത്രമാണ് അദ്ദേഹം പ്രതികരിച്ചത്.

ചാന്ദ്രയാന്‍3യുടെ ചര്‍ച്ചക്കിടെയായിരുന്നു രമേശ് ബിധുരി ഡാനിഷ് അലിയെ അധിക്ഷേപിച്ചത്. തീവ്രവാദി, പിമ്പ്, മുല്ല തുടങ്ങി അധിക്ഷേപവര്‍ഷമാണ് ബിധുരി നടത്തിയത്. അദ്ദേഹത്തിന്റെ വാക്കുകള്‍ കേട്ട് പൊട്ടിച്ചിരിക്കുന്ന മുന്‍ ആരോഗ്യമന്ത്രി ഹര്‍ഷവര്‍ധന്റെ ദൃശ്യങ്ങള്‍ വൈറലായിരുന്നു. രമേശ് ബിധുരിക്കെതിരെ നടപടി ആവശ്യപ്പെട്ട് ഡാനിഷ് അലി സ്പീക്കര്‍ക്ക് പരാതി നല്‍കി. തനിക്കെതിരായ അധിക്ഷേപത്തില്‍ വികാരഭരിതനായാണ് അദ്ദേഹം പ്രതികരിച്ചത്.