തിരുവനന്തപുരം: പാര്‍ട്ടി കീഴ്‌വഴക്കങ്ങള്‍ മറികടന്നു മുന്‍ എംപിയും നടനുമായ സുരേഷ് ഗോപി ബിജെപി കോര്‍ കമ്മിറ്റിയില്‍. കേന്ദ്ര നേതൃത്വത്തിന്റെ നിര്‍ദേശമനുസരിച്ചാണ് പുതിയ തീരുമാനം. സാധാരണ രീതിയില്‍ പാര്‍ട്ടി പ്രസിഡന്റും മുന്‍ പ്രസിഡന്റുമാരും ജനറല്‍ സെക്രട്ടറിമാരും മാത്രമാണ് കോര്‍ കമ്മിറ്റിയില്‍ ഇടംപിടിക്കാണ്. എന്നാല്‍ ആ കീഴ്‌വഴക്കങ്ങള്‍ മറികടന്നാണ് സുരേഷ് ഗോപിയുടെ കോര്‍ കമ്മിറ്റി പ്രവേശനം. സുരേഷ് ഗോപി നേതൃത്വത്തിലേക്ക് വരുന്നതില്‍ ബി.ജെ.പി സംസ്ഥാന അധ്യക്ഷന്‍ കെ.സുരേന്ദ്രനും അനുകൂല നിലപാടാണ്.

സംസ്ഥാനത്തെ ബിജെപി നേതാക്കള്‍ തമ്മിലുള്ള ഏകോപനമില്ലായ്മയാണ് കേരളത്തില്‍ ബി.ജെ.പി യുടെ മുന്നേറ്റത്തിന് തടസമാകുന്നതെന്ന കേന്ദ്ര നേതൃത്വത്തിന്റെ വിലയിരുത്തലാണ് പുതിയ തീരുമാനങ്ങള്‍ക്ക് കാരണം. സംസ്ഥാനത്തിന്റെ ചുമതലയുള്ള പ്രകാശ് ജാവഡേക്കര്‍ കഴിഞ്ഞ ദിവസം സുരേഷ് ഗോപി ഉള്‍പ്പടെയുള്ള നേതാക്കളുമായി കൂടിക്കാഴ്ച നടത്തിയിരുന്നു. അതിന് പിന്നാലെയാണ് സുരേഷ് ഗോപി കോര്‍ കമ്മറ്റിയില്‍ ഉള്‍പ്പെടുത്താനുള്ള തീരുമാനമുണ്ടായത്.

ലോക്സഭാ തെരഞ്ഞടുപ്പിന് മുന്നോടിയായി സംസ്ഥാനത്തെ നേതൃത്വത്തില്‍ കാര്യമായ അഴിച്ചുപണി ഉണ്ടാകാനാണ് ബി.ജെ.പി ശ്രമിക്കുന്നത്. കെ.സുരേന്ദ്രന്റെ സംസ്ഥാന പ്രസിഡന്റ് കാലാവധി ജനുവരിയില്‍ അവസാനിക്കും. കെ സുരേന്ദ്രനെ പ്രസിഡന്റ് സ്ഥാനത്തു നിന്നും മാറ്റി സുരേഷ് ഗോപിയെ അധ്യക്ഷ സ്ഥാനത്തേക്ക് കൊണ്ടുവരും എന്ന തരത്തിലുള്ള ചില സൂചനകള്‍ നേരത്തെ വന്നിരുന്നെങ്കിലും സുരേഷ് ഗോപി ഇക്കാര്യം നിഷേധിച്ചിരുന്നു.