ഗണേശോത്സവത്തിനിടെ ബുര്‍ഖ ധരിച്ച് നൃത്തം ചെയ്തയാള്‍ പിടിയില്‍; വേഷം മാറിയെത്തിയത് അരുണ്‍ കുമാര്‍ എന്ന യുവാവ്

ചെന്നൈ: ഗണേശോത്സവത്തിനിടെ ബുര്‍ഖ ധരിച്ച് നൃത്തംചെയ്ത യുവാവ് അറസ്റ്റില്‍. വിരുത്തംപട്ട് സ്വദേശി അരുണ്‍കുമാര്‍ ആണ് പിടിയിലായത്. തമിഴ്‌നാട്ടിലെ വെല്ലൂരില്‍ നടന്ന വിനായക ചതുര്‍ഥി ആഘോഷത്തിനിടെയാണ് ബുര്‍ഖ ധരിച്ച് യുവാവ് നൃത്തം ചെയ്തത്.

സംഭവത്തിന്റെ വിഡിയോ കഴിഞ്ഞ ദിവസം സമൂഹ മാധ്യമങ്ങളില്‍ വൈറലായിരുന്നു. ഇതിനു പിന്നാലെ നടപടി ആവശ്യപ്പെട്ട് പൊലിസില്‍ നിരവധി പരാതികള്‍ ലഭിച്ചു. ആഘോഷത്തില്‍ പങ്കെടുക്കുന്ന വിശ്വാസികള്‍ക്കിടയില്‍ നുഴഞ്ഞുകയറി കുഴപ്പങ്ങളുണ്ടാക്കാനായിരുന്നു ഇയാളുടെ നീക്കമെന്നായിരുന്നു പരാതി. തുടര്‍ന്ന് നടത്തിയ അന്വേഷണത്തിലാണ് അരുണ്‍കുമാര്‍ അറസ്റ്റിലായതെന്ന് വെല്ലൂര്‍ പൊലിസ് അറിയിച്ചു.

ഇത് ഇരു സമുദായങ്ങള്‍ക്കിടയില്‍ വലിയ സംഘര്‍ഷത്തിന് കാരണമാകുമായിരുന്നുവെന്ന് പൊലിസ് ചൂണ്ടിക്കാട്ടി. മതവികാരം വ്രണപ്പെടുത്തല്‍, രണ്ടു മതവിഭാഗങ്ങള്‍ക്കിടയില്‍ വിദ്വേഷമുണ്ടാക്കാന്‍ ശ്രമം നടത്തി തുടങ്ങിയ കുറ്റങ്ങള്‍ ചുമത്തിയാണ് പ്രതിക്കെതിരെ കേസെടുത്തത്.

സംസ്ഥാനത്ത് വര്‍ഗീയ സംഘര്‍ഷം സൃഷ്ടിക്കാന്‍ ശ്രമിക്കുന്നവര്‍ക്കെതിരെ ശക്തമായ നടപടിയെടുക്കുമെന്ന് പൊലിസ് മുന്നറിയിപ്പ് നല്‍കിയിട്ടുണ്ട്.