നിസാം കെ. അബ്ദുല്ല

ഫുട്‌ബോൾ ഇതിഹാസങ്ങൾക്ക് പഞ്ഞമില്ലാത്ത നാട്. ഏറ്റവും കൂടുതൽ ലോകകപ്പ് നേടിയവരിൽ ബ്രസീലിന് പിന്നിൽ ജർമനിക്കൊപ്പം രണ്ടാമത്. പ്രതിരോധക്കോട്ട കെട്ടി എതിരാളികളുടെ മുന്നേറ്റത്തിന്റെ മുനയൊടിക്കുന്നവർ. ലോകം ആക്രമണ ഫുട്‌ബോളിന് വളക്കൂറുള്ള മണ്ണായി മാറുമ്പോഴും പ്രതിരോധം തീർത്ത് വിജയങ്ങൾ കൊയ്യുന്നവർ. ഇക്കഴിഞ്ഞ യൂറോയിലെ ചാംപ്യൻമാർ. ലൂജി റൈവ, ഗുസിപ്പോ മിയേസ, സിൽവിയോ പിയോള, റോബർട്ടോ ബാജിയോ, അലെസാന്ദ്രോ ദെൽപിയറോ, ഫ്രാൻസെസ്‌കോ ടോട്ടി, പൗളോ മൽദിനി, ജിയാൻലുജി ബഫൺ തുടങ്ങി നിരവധി ഇതിഹാസങ്ങളെ ഫുട്‌ബോൾ ലോകത്തിന് സമ്മാനിച്ചവർ. ഇങ്ങനെ എണ്ണിയാലൊടുങ്ങാത്ത വിശേഷണങ്ങളുള്ള, അസൂറികൾ എന്ന വിളിപ്പേരുള്ളവർ – ഇറ്റലി. പക്ഷേ ഈ ലോകകപ്പിൽ ആരാധകരെ കളിമികവ് കൊണ്ട് കോരിത്തരിപ്പിക്കാൻ അവരില്ല. റോബോർട്ടോ മാൻസീനിയുടെ കീഴിൽ തുടരെത്തുടരെ വിജയങ്ങളുമായി യൂറോ കപ്പിൽ മുത്തമിട്ട ഇറ്റലി ലോകകപ്പിലും തങ്ങളുടെ കേളീശൈലിയുമായി കളംനിറയുമെന്ന് കരുതിയവരെ അക്ഷരാർഥത്തിൽ ഞെട്ടിച്ച് നാടകീയ പുറത്താവൽ.

യൂറോപ്യൻ യോഗ്യതാ മത്സരത്തിൽ സി ഗ്രൂപ്പിൽ സ്വിറ്റ്സർലൻഡിന് പിന്നിൽ രണ്ടാം സ്ഥാനത്തേക്ക് പിന്തള്ളപ്പെട്ടു. അപ്പോഴും സാധ്യതകൾ മങ്ങിയില്ല. പ്ലേഓഫിലൂടെ ഖത്തറിലേക്ക് ഇറ്റലിയെത്തുമെന്ന പ്രതീക്ഷയിലായി കളിക്കമ്പക്കാർ. എന്നാൽ പ്ലേഓഫിലെ ആദ്യ മത്സരത്തിൽ കുഞ്ഞൻമാരായ നോർത്ത് മാസിഡോണിയ ഇറ്റലിയുടെ വഴി മുടക്കി. എതിരില്ലാത്ത ഒരു ഗോളിനായിരുന്നു പരാജയം.

1910ൽ ഫുട്‌ബോളിൽ അരങ്ങേറിയ അസൂറികൾ 1934ലാണ് ആദ്യമായി ലോകകപ്പിൽ ബൂട്ടുകെട്ടുന്നത്. ലോകകപ്പിലെ അരങ്ങേറ്റത്തിലും തൊട്ടടുത്തെ 1938ലും തുടർച്ചയായി രണ്ട് കിരീടങ്ങൾ തങ്ങളുടെ ഷോക്കേസിലെത്തിച്ചാണ് ഫുട്‌ബോൾ ചരിത്രത്തിലേക്ക് ഇറ്റലി നടന്നുകയറിയത്. 1982ൽ ഗോൾഡൻ ബോളും ഗോൾഡൻ ബൂട്ടും തന്റെ ഷോക്കേസിലെത്തിച്ച പാവ്‌ലോ റോസിയുടെ കളി മികവിൽ ഇറ്റലി വീണ്ടും ലോകത്തിന്റെ നെറുകയിലെത്തി. 2006ൽ ഫാബിയോ കന്നവാരോയെന്ന ഉരുക്കുമതിലിന്റെ കരുത്തിലും ഇറ്റലി ലോകകപ്പ് നേട്ടം ആവർത്തിച്ചു.

2012 യൂറോകപ്പിൽ ഫൈനലിലെത്തിയെങ്കിലും സ്‌പെയിനിനോട് എതിരില്ലാത്ത നാല് ഗോളിനായിരുന്നു അവരുടെ പരാജയം. 2020 യൂറോകപ്പിലാണ് 16 വർഷങ്ങൾക്ക് ശേഷം വീണ്ടും ഇറ്റാലിയൻ കരുത്ത് തെളിഞ്ഞത്. അന്ന് ഇംഗ്ലണ്ടിനെ തകർത്ത് കിരീടനേട്ടത്തിൽ അവരെത്തി. പരാജയമറിയാതെയുള്ള നീണ്ട മത്സരങ്ങളാണ് മാൻസീനിയും സംഘവും ആരാധകർക്ക് സമ്മാനിച്ചത്. എന്നാൽ പിന്നാലെ ലോകകപ്പ് പ്ലേഓഫിൽ അപ്രതീക്ഷിത പരാജയം രുചിച്ച് പുറത്തായി. ഗ്രൗണ്ടിലിറങ്ങിയാൽ ഉറച്ച പ്രതിരോധം തീർത്തായിരുന്നു ഇറ്റലി കളികൾ തങ്ങൾക്ക് അനുകൂലമാക്കിയിരുന്നത്. എന്നാൽ പ്രതിരോധം തീർക്കാനിറങ്ങിയ അവർ ലോകകപ്പിന്റെ യോഗ്യത കടമ്പയിൽ എതിരാളികളുടെ ആക്രമണങ്ങളിൽ പിടഞ്ഞുവീണു.