ബംഗളൂരൂ: തെലുങ്ക് സിനിമാ താരങ്ങളായ പവന്‍ കല്യാണിന്റേയും ജൂനിയര്‍ എന്‍.ടി.ആറിന്റേയും ആരാധകര്‍ തമ്മിലുണ്ടായ ഏറ്റുമുട്ടലില്‍ ഒരാള്‍ കുത്തേറ്റ് മരിച്ചു. പവന്‍ കല്യാണിന്റെ ആരാധകനായ വിനോദ് കുമാര്‍ (24) ആണ് മരിച്ചത്. പവന്‍ കല്യാണ്‍ നേതൃത്വം നല്‍കുന്ന രാഷ്ട്രീയ പാര്‍ട്ടിയിലെ അംഗമാണ് കൊല്ലപ്പെട്ട വിനോദ് കുമാര്‍. കോലാറില്‍ ഒരു ചടങ്ങിനിടെയാണ് സംഭവം. കൊലപാതകവുമായി ബന്ധപ്പെട്ട് ജൂനിയര്‍ എന്‍.ടി.ആറിന്റെ ആരാധകനായ അക്ഷയെ പൊലിസ് അറസ്റ്റു ചെയ്തു.
പവന്‍  കല്യാണിന്റെ പാര്‍ട്ടിയായ ജനസേന സംഘടിപ്പിച്ച അവയവദാന ബോധവല്‍കരണപരിപാടിക്കിടെയായിരുന്നു സംഘര്‍ഷമുണ്ടായത്.
പരിപാടിയില്‍ പവന്‍ ജയിക്കട്ടെ എന്ന് ആരാധകര്‍  വിളിച്ചു പറഞ്ഞതോടെ സംഘര്‍ഷമുണ്ടാവുകയായിരുന്നു.
 ചടങ്ങില്‍ പങ്കെടുത്ത ജൂനിയര്‍ എന്‍.ടി.ആറിന്റെ ആരാധകര്‍ക്ക് ഇത് അംഗീകരിക്കാന്‍ കഴിഞ്ഞില്ല. അവര്‍ ജൂനിയര്‍ എന്‍.ടി.ആറിന് അനുകൂലമായി മുദ്രാവാക്യം മുഴക്കി. തുടര്‍ന്ന് ഇരു വിഭാഗവും ഏറ്റുമുട്ടുകയുമായിരുന്നു. തുടര്‍ന്നാണ് വിനോദിന് നെഞ്ചില്‍ കുത്തേറ്റത്. ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കാനായില്ല.