തിരുവനന്തപുരം: നിരവധി ക്രിമിനല്‍കേസുകളില്‍ പ്രതി
യായ മേനംകുളം പുതുവല്‍ പുത്തന്‍വീട്ടില്‍ ഷെബിന്‍ (25) പിടിയില്‍.  
ഇന്നലെ തുമ്പ ആറാട്ടുവഴി ജങ്ഷനു സമീപം നാടന്‍ബോംബുകളുമായി ഭീകരാന്തരീക്ഷം സൃഷ്ടിച്ചതിനാണ് ഇയാള്‍ പിടിയിലായത്. 2011 ജനുവരിയില്‍ മേനംകുളം സമാധി കോവിലനു സമീപം ഡേവിസിനെ ബോംബെറിഞ്ഞ് കൊലപ്പെടുത്താന്‍ ശ്രമിച്ചതിനും മരിയന്‍ എന്‍ജി. കോളജിനു സമീപം ഒരു അന്യസംസ്ഥാന തൊഴിലാളിയുടെ മൊബൈലും പണവും കവര്‍ന്നതിനും 2011ല്‍ കല്ലിംഗലുള്ള ഗോപാല്‍ സര്‍ദാര്‍ എന്നയാളെ വെട്ടിപ്പരുക്കേല്‍പ്പിച്ച് 16,000 രൂപ കവര്‍ന്ന കേസിലും ഇയാള്‍ പ്രതിയാണ്.
2011 ഫെബ്രുവരിയില്‍ വാളും സ്‌ഫോടകവസ്തുക്കളുമായി തുമ്പ സെന്റ്‌സേവിയേഴ്‌സ് കോളജിനു സമീപം ഭീകരാന്തരീക്ഷം സൃഷ്ടിച്ചതിനും അതേവര്‍ഷം ഡിസംബറില്‍ അമ്പലത്തിന്‍കര ഭാഗത്തുവച്ച് ഒരു പെണ്‍കുട്ടിയെ തടഞ്ഞുനിര്‍ത്തി സ്വര്‍ണ്ണമാല കവര്‍ന്നതിനും 2013ല്‍ മേനംകുളം സ്വദേശി ജോണിനെ പടക്കമെറിഞ്ഞതിനും ഇയാള്‍ക്കെതിരേ കേസുണ്ട്.
കണ്‍ട്രോള്‍റൂം എ.സി സുരേഷ്‌കുമാര്‍, കഴക്കൂട്ടം സൈബര്‍ സിറ്റി സബ്ഡിവിഷന്‍ എ.സി പ്രമോദ്കുമാര്‍ എന്നിവരുടെ നേതൃത്വത്തില്‍ കഴക്കൂട്ടം ടെക്‌നോപാര്‍ക്ക് സി.ഐ എസ്. അജയ്കുമാര്‍, കഴക്കൂട്ടം എസ്.ഐ ഡിപ്പിന്‍, സീതാറാം, സി.സി.പി.ഒമാരായ സുലൈമാന്‍, ബാബു ഷാഡോ ടീമിലെ യശോധരന്‍, അരുണ്‍കുമാര്‍, വിനോദ്, പ്രദീപ്, അതുന്‍ എന്നിവര്‍ ഉള്‍പ്പെട്ട സംഘം പിടികൂടിയ പ്രതിയെ കോടതിയില്‍ ഹാജരാക്കി.