ലക്‌നോ: കഴിഞ്ഞ അഞ്ച് വര്‍ഷത്തിനിടെ ഉത്തര്‍പ്രദേശ് പൊലിസ് 166 ക്രിമിനലുകളെ ഏറ്റുമുട്ടലില്‍ വധിച്ചതായി മുഖ്യമന്ത്രി യോഗി ആദിത്യനാഥ്. ഏറ്റുമുട്ടലുകളില്‍ 4,453 പേര്‍ക്ക് പരുക്കേറ്റു. കുറ്റകൃത്യങ്ങളോട് യാതൊരു വിട്ടുവീഴ്ചയും പാടില്ലെന്നത് സര്‍ക്കാര്‍ നയമാണെന്നും അദ്ദേഹം വ്യക്തമാക്കി. റിസര്‍വ് പൊലിസ് ലൈന്‍സില്‍ നടന്ന പൊലിസ് മെമ്മോറിയല്‍ ഡേ പരേഡിനെ അഭിസംബോധന ചെയ്യുകയായിരുന്നു അദ്ദേഹം.

2017നും 2022നുമിടയില്‍ 13 പൊലിസുകാര്‍ ഏറ്റുമുട്ടലുകളില്‍ കൊല്ലപ്പെട്ടു. ആയിരത്തോളം പൊലിസുകാര്‍ക്ക് പരുക്കേറ്റു. വീരമൃത്യു വരിച്ച പൊലിസുകാരുടെ കുടുംബങ്ങളുടെയും പരുക്കേറ്റവരുടെയും ക്ഷേമത്തിനായി സാധ്യമായ എല്ലാ സേവനങ്ങളും തുടര്‍ന്നും ഉറപ്പാക്കുമെന്ന് മുഖ്യമന്ത്രി അറിയിച്ചു.

പൊലിസുകാര്‍ക്ക് മാസത്തില്‍ മോട്ടോര്‍സൈക്കിള്‍ അലവന്‍സായി 500 രൂപ അനുവദിക്കുമെന്ന് മുഖ്യമന്ത്രി പ്രഖ്യാപിച്ചു. നേരത്തേ ഇത് 200 രൂപയായിരുന്നു. ഗസറ്റഡ് റാങ്കിനു പുറത്തുള്ള എല്ലാ പൊലിസുകാര്‍ക്കും അലവന്‍സ് ലഭിക്കും. ഫോണ്‍ അലവന്‍സായി വര്‍ഷത്തില്‍ 2,000 രൂപ പൊലിസുകാര്‍ക്ക് നല്‍കുമെന്ന് സര്‍ക്കാര്‍ പത്രക്കുറിപ്പില്‍ അറിയിച്ചു.