ഗസ്സക്കു നേരെ ആക്രമണം തുടങ്ങി ഇസ്‌റാഈല്‍; 14 കേന്ദ്രങ്ങളില്‍ ഏറ്റുമുട്ടല്‍

ജറുസലെം: ഗസ്സക്ക് നേരെ ഇസ്‌റാഈല്‍ ആക്രമണം തുടങ്ങി. ഗസ്സ മുനമ്പിലെ 14 കേന്ദ്രങ്ങളില്‍ സായുധ ഏറ്റുമുട്ടല്‍ തുടരുകയാണ്. 'ഉരുക്ക് വാള്‍'എന്നാണ് ഇസ്‌റാഈല്‍ ഓപ്പറേഷന് പേരിട്ടിരിക്കുന്നത്. ഗസ്സക്ക് നേരെ കരയുദ്ധവും പരിഗണയിലെന്ന് ഇസ്‌റാഈല്‍ സൈന്യം അറിയിച്ചു. അതേസമയം ജനങ്ങള്‍ സൈനിക നിര്‍ദേശം അനുസരിക്കണം. യുദ്ധത്തെ കുറിച്ച് ഒരു പ്രസ്താവനയും നടത്തരുതെന്ന് മന്ത്രിമാരോട് നെതന്യാഹു പറഞ്ഞു.

മൂന്ന് കുടിയേറ്റ കോളനികളുടെ നിയന്ത്രണം ഹമാസിന്റെ പക്കലെന്നാണ് ഇസ്‌റാഈല്‍ പറയുന്നത്. 35 ഇസ്‌റാഈലികള്‍ ഹമാസ് പിടിയിലെന്ന് ഇസ്‌റാഈല്‍ റേഡിയോ റിപ്പോര്‍ട്ട് ചെയ്തു. ഹമാസ് ആക്രമണത്തില്‍ ആറ് പേര്‍ കൊല്ലപ്പെട്ടതായും 300 പേര്‍ക്ക് പരിക്കേറ്റതായും 40 പേരുടെ നില അതീവ ഗുരുതരമെന്നും റിപ്പോര്‍ട്ടില്‍ പറയുന്നു.

ഇന്ന് പുലര്‍ച്ചെയാണ് ഓപറേഷന്‍ അല്‍ അഖ്‌സ ഫഌഡ്' ഇസ്‌റാഈലിനെതിരെ ശക്തമായ ചെറുത്തുനില്‍പ് പ്രഖ്യാപനവുമായി ഹമാസ് രംഗത്തെത്തിയത്. 5000 റോക്കറ്റുകള്‍ ഇസ്‌റാഈല്‍ സൈനിക കേന്ദ്രങ്ങള്‍ക്കു നേരെ അയച്ചതായി ഹമാസ് പ്രതിരോധ വിഭാഗം അറിയിച്ചു.