നെടുമ്പാശ്ശേരി : സമയക്രമീകരണം മാറിമറിയുന്ന വിമാനസര്‍വീസുകള്‍ക്കിടയില്‍ തീര്‍ഥാടകര്‍ക്കും സംസ്ഥാന ഹജ്ജ് കമ്മിറ്റിക്കും ആശ്വാസമായി മാറുകയാണ് സെന്‍ട്രല്‍ ഹജ്ജ് കമ്മിറ്റിയുടെ സെല്ലിന്റെ പ്രവര്‍ത്തനം. കേന്ദ്രഹജ്ജ് കമ്മിറ്റിയുടെ ഇന്‍ചാര്‍ജ് ഓഫിസര്‍ മുംബൈ സ്വദേശി ഷേക്ക് മുഹമ്മദ് സലീമിന്റെ നേതൃത്വത്തിലാണ് ഹജ്ജ് ക്യാംപില്‍ സെന്‍ട്രല്‍ ഹജ്ജ് കമ്മറ്റിയുടെ പ്രവര്‍ത്തനം.
മുംബൈയില്‍ നിന്നുള്ള മസ്താന്‍ ആദില്‍, മന്‍സൂരി മുസമ്മില്‍ എന്നിവരാണ് സെന്‍ട്രല്‍ ഹജ്ജ് കമ്മിറ്റി ഓഫിസിന്റെ പ്രവര്‍ത്തനങ്ങള്‍ ക്രോഡീകരിക്കുന്നത്. സഊദി എയര്‍ലൈന്‍സിന്റെ വിമാനസമയങ്ങളിലുണ്ടാകുന്ന മാറ്റം ഉള്‍പ്പടെയുള്ളവയ്ക്ക അനുസരിച്ച് യാത്രരേഖകള്‍ തയ്യാറാക്കുകയും അതിന്റെ അനുമതി ഹജ്ജ് കോണ്‍സിലേറ്റുമായി ബന്ധപ്പെട്ട് നേടിയെടുക്കുകയും യാത്രാരേഖകള്‍ ക്രമീകരിക്കുകയും ചെയ്യുന്നത് സെന്‍ട്രല്‍ ഹജ്ജ് കമ്മിറ്റിയാണ്. കൊച്ചിയിലെ എംപാര്‍ക്കേഷന്‍ പോയിന്റിലെ ക്രമീകരണങ്ങള്‍ മുഴുവന്‍ നടത്തുന്നത് ഷേക്ക് മുഹമ്മദ് സലീമിന്റെ നേതൃത്വത്തിലാണ്.
എമിഗ്രേഷന്‍ എസ്.പി കരീമിന്റെ നേതൃത്വത്തില്‍ 31 ഉദ്യോഗസ്ഥരാണ് ഹജ്ജ് ക്യാംപിലെ മറ്റ് പ്രവര്‍ത്തനങ്ങള്‍ നടത്തുന്നത്. സംസ്ഥാന ഹജ്ജ് കമ്മറ്റി ചെയര്‍മാന്‍ കോട്ടുമല ബാപ്പുമുസ്‌ലാരുടെ നേതൃത്വത്തിലുള്ള സംസ്ഥാന ഹജ്ജ് കമ്മറ്റിയുടെ പ്രവര്‍ത്തനങ്ങള്‍ക്ക് പൂര്‍ണപിന്തുണ നല്‍കി കൊണ്ടാണ് ഷേക്ക് മുഹമ്മദ് സലീമിന്റെ നേതൃത്വത്തിലുള്ള പ്രവര്‍ത്തനം.
തീര്‍ഥാടകര്‍ക്ക് യാതൊരു വിധ ബുദ്ധിമുട്ടുകൂടാതെ പോകുന്നതിനുള്ള ക്രമീകരണങ്ങളാണ് സെന്‍ട്രല്‍ ഹജ്ജ് കമ്മിറ്റി സെല്ല് നടത്തുന്നത്. കൊച്ചിയില്‍ ആദ്യമായി എത്തുന്ന ഷേക്ക് മുഹമ്മദ് സലീമിന് മലയാളികളെക്കുറിച്ചും സംസ്ഥാന ഹജ്ജ ് കമ്മിറ്റിയെക്കുറിച്ചും നല്ല മതിപ്പാണ്.