അടൂര്‍ (പത്തനംതിട്ട): സ്വകാര്യ സ്‌കാനിങ് സെന്ററില്‍ സ്‌കാനിങ്ങിന് എത്തിയ യുവതി വസ്ത്രംമാറുന്ന ദൃശ്യം പകര്‍ത്തിയ കേസില്‍ റേഡിയോഗ്രോഫറെ പൊലിസ് അറസ്റ്റ് ചെയ്തു. അടൂര്‍ നഗരത്തില്‍ അടൂര്‍ ജനറല്‍ ആശുപത്രി ജങ്ഷനില്‍ അടുത്തിടെ ആരംഭിച്ച ദേവി സ്‌കാനിങ് സെന്ററിലെ റേഡിയോഗ്രോഫര്‍ കൊല്ലം കടയ്ക്കല്‍ ചിതറ സ്വദേശി രഞ്ജിത്ത് (24) ആണ് പിടിയിലായത്.

എംആര്‍ഐ സ്‌കാനിങ്ങിന് വന്ന യുവതി യുവതി വസ്ത്രം മാറുന്നതിനിടെയാണ് ഇയാള്‍ ദൃശ്യങ്ങള്‍ പകര്‍ത്തിയത്. വസ്ത്രം മാറുന്ന മുറിക്ക് സമീപം മറഞ്ഞു നിന്ന് രംഗം മൊബൈല്‍ കാമറയില്‍ ചിത്രീകരിക്കുകയായിരുന്നു.

വെള്ളിയാഴ്ച രാത്രിയാണ് സംഭവം. ഏഴംകുളം സ്വദേശിനിയുടെ ദൃശ്യങ്ങളാണ് രഞ്ജിത്ത് പകര്‍ത്തിയത്. സംശയം തോന്നിയ പെണ്‍കുട്ടി നടത്തിയ പരിശോധനയില്‍ ദൃശ്യങ്ങള്‍ പകര്‍ത്തിയെന്ന് മനസിലായതോടെ ബഹളമുണ്ടാക്കി പൊലിസിനെ അറിയിക്കുകയായിരുന്നു.

ഉടന്‍ തന്നെ പൊലിസ് സ്ഥലത്തെത്തി രഞ്ജിത്തിനെ കസ്റ്റഡിയില്‍ എടുത്തു. പെണ്‍കുട്ടിയുടെ മൊഴിയുടെ അടിസ്ഥാനത്തില്‍ പൊലിസ് കേസ് രജിസ്റ്റര്‍ ചെയ്തു. സമാന രീതിയില്‍ മുന്‍പും പ്രതി ദൃശ്യങ്ങള്‍ പകര്‍ത്തിയിട്ടുണ്ടോ എന്നും പൊലിസ് അന്വേഷിക്കുന്നുണ്ട്.