ദുബൈ: പുതുവര്‍ഷത്തെ സ്വാഗതം ചെയ്യാന്‍ റാസല്‍ഖൈമ ഒരുങ്ങുന്നു. 2023നെ വരവേല്‍ക്കാനാണ് റെക്കോഡ് വെടിക്കെട്ടൊരുക്കാന്‍ റാസല്‍ഖൈമ ഒരുങ്ങുന്നത്.അല്‍ മര്‍ജാന്‍ ദ്വീപുകള്‍ക്കും അല്‍ഹംറ വില്ലേജിനും ഇടയിലുള്ള കടല്‍തീരത്ത് 4.7 കിലോ മീറ്ററില്‍ പൈറോ മ്യൂസിക്കല്‍ ഡിസ്പ്‌ളേകളുടെ ആസ്വാദനത്തിനൊപ്പം 12 മിനിറ്റ് ദൈര്‍ഘ്യമുള്ള വെടിക്കെട്ടാണ് കാണികള്‍ക്കായി ഒരുക്കുക. കഴിഞ്ഞ വര്‍ഷത്തേതിലും പുതുമകളോടെയാണ് ഇത്തവണത്തെ ആഘോഷങ്ങളെന്ന് റാക് ടൂറിസം ഡെവലപ്പ്‌മെന്റ് അതോറിറ്റി വൃത്തങ്ങള്‍ പറഞ്ഞു. ആഭ്യന്തര,ആരോഗ്യ മന്ത്രാലയങ്ങളും പൊതുസേവന വകുപ്പ് തുടങ്ങി വിവിധ വകുപ്പുകളും സ്ഥാപനങ്ങളുമായി സഹകരിച്ചാണ് പരിപാടികള്‍ നടത്തുക.