ആശാന്റെ വരവ് ആഘോഷമാക്കാനൊരുങ്ങി ബ്ലാസ്റ്റേഴ്‌സും ആരാധകരും

കൊച്ചി: സ്വന്തം തട്ടകത്തില്‍ വിജയം സ്വന്തമാക്കാനായി കേരള ബ്ലാസ്‌റ്റേഴ്‌സ് ഇന്നിറങ്ങുന്നു. സസ്‌പെന്‍ഷന് ശേഷം കോച്ച് ഇവാന്‍ വുകോമനോവിച്ച് തിരികെയെത്തുന്ന ഈ മത്സരത്തില്‍ ഒഡിഷ എഫ് സിയാണ് എതിരാളികള്‍. മത്സരം ഇന്ന് രാത്രി എട്ടിന് കൊച്ചിയിലാണ്. നീണ്ട പത്ത് മത്സരത്തിലെ വിലക്കിനൊടുവില്‍ ഡഗ് ഔട്ടിലേക്ക് എത്തുന്ന ഇവാന്‍ ആശാന് മറക്കാനാകാത്ത സ്വീകരണമായിരിക്കും ഗാലറിയില്‍ ആരാധകര്‍ ഒരുക്കുക.

മഞ്ഞപ്പടയ്ക്ക് താരങ്ങളേക്കാള്‍ വിശ്വസ്തനായ ഇവാന്‍ തിരിച്ചെത്തുമ്പോള്‍ ടീമിലും തന്ത്രങ്ങളിലും മാറ്റം ഉറപ്പ്. സ്വന്തം തട്ടകത്തിലാണെങ്കിലും എ എഫ് സി കപ്പില്‍ മാലദ്വീപ് ക്ലബിനെ ഗോളില്‍ മുക്കിയെത്തുന്ന ഒഡിഷ എഫ് സിയെ മറികടക്കുക അത്ര എളുപ്പമാവില്ല. സസ്‌പെന്‍നിലായ മിലോസ്ഡ്രിന്‍സിച്ച് , പ്രബീര്‍ ദാസ്, പരിക്കേറ്റ ജിക്ക്‌സണ്‍ സിംഗ്, മാര്‍കോ ലെസ്‌കോവിച്ച് തുടങ്ങിയവരുടെ അഭാവം മറികടക്കുകയെന്ന് വലിയ വെല്ലുവിളി ഉണര്‍ത്തുന്നുണ്ട്.

ഇരു ടീമുകളും നേര്‍ക്കുനേര്‍ ഏറ്റ് മുട്ടുന്ന ഇരുപത്തിയൊന്നാമത്തെ മത്സരമാണിത്.ലീഗില്‍ ബ്ലാസ്റ്റേഴ്‌സ് അഞ്ചും ഒഡിഷ നാലും സ്ഥാനത്താണുള്ളത്.10 ാം സീസണിലെ തുടക്കത്തിലെ രണ്ട് കളികളിലും ബ്ലാസ്‌റ്റേഴ്‌സ് വിജയം നേടിയിരുന്നു, ഒരു കളിയില്‍ തോല്‍ക്കുകയും മറ്റൊരു കളിയില്‍ സമനില സ്വന്തമാക്കുകയും ചെയ്തു.