കളമശ്ശേരി സ്‌ഫോടനം; വിദ്വേഷ പ്രചരണം നടത്തിയ ജനം ടി.വിക്കെതിരെ കേസെടുത്തു

തിരുവനന്തപുരം: കളമശ്ശേരി സ്‌ഫോടനത്തിന് പിന്നാലെ പ്രകോപനപരമായ വാര്‍ത്തകള്‍ സംപ്രേക്ഷണം ചെയ്‌തെന്ന പരാതിയില്‍ ജനം ടി.വിക്കെതിരെ പൊലിസ് കേസ്. യൂത്ത് ലീഗ് ജനറല്‍ സെക്രട്ടറി പി.കെ ഫിറോസ് നല്‍കിയ പരാതിയുടെ അടിസ്ഥാനത്തില്‍ എളമക്കര പൊലിസാണ് കേസ് രജിസ്റ്റര്‍ ചെയ്തത്.

പ്രത്യേക മതവിഭാഗത്തിനെതിരെ മനപൂര്‍വ്വം വ്യാജ വാര്‍ത്തകള്‍ പ്രചരിപ്പിച്ചെന്നാണ് പരാതി. കലാപമുണ്ടാക്കാനുള്ള ആഹ്വാനത്തോടെ പ്രകോപനമുണ്ടാക്കിയതിന് ഐ.പി.സി 153 പ്രകാരമാണ് കേസെടുത്തത്.

കളമശ്ശേരി സ്‌ഫോടനം നടന്നതിന് പിന്നാലെ സമൂഹ മാധ്യമങ്ങളിലടക്കം വിദ്വേഷജനകമായ നിരവധി വാര്‍ത്തകളാണ് പ്രചരിച്ചത്. മുഖ്യധാര മാധ്യമങ്ങളടക്കം ഇത്തരം വാര്‍ത്തകള്‍ ഏറ്റെടുത്തതോടെ വലിയ രീതിയിലുള്ള വിമര്‍ശനവും ഉയര്‍ന്നിരുന്നു.

സ്‌ഫോടനവുമായി ബന്ധപ്പെട്ട വിദ്വേഷ പരാമര്‍ശത്തില്‍ ഇതിനോടകം നിരവധി കേസുകളാണ് രജിസ്റ്റര്‍ ചെയ്തത്. സ്‌ഫോടനത്തെ കുറിച്ച് തെറ്റിദ്ധാരണ പരത്തിയ ബി.ജെ.പി നേതാവും, കേന്ദ്ര മന്ത്രിയും, ഏഷ്യാനെറ്റ് എ.ഡിയുമായ രാജീവ് ചന്ദ്രശേഖറിനെതിരെ ജാമ്യമില്ലാ വകുപ്പ് പ്രകാരമാണ് എറണാകുളം സെന്‍ട്രല്‍ പൊലിസ് കേസെടുത്തത്.

''ഹമാസിന്റെ ജിഹാദിനുള്ള പരസ്യാഹ്വാനം ക്രിസ്ത്യാനികള്‍ക്കെതിരായ ആക്രമണത്തിനു കാരണമാകുമ്പോള്‍ ഡല്‍ഹിയിലിരുന്ന് ഇസ്രായേലിനെതിരെ പ്രതിഷേധിക്കുകയാണ് മുഖ്യമന്ത്രി'' എന്നായിരുന്നു കേന്ദ്രമന്ത്രിയുടെ പരാമര്‍ശം. ആരോപണം തെളിഞ്ഞാല്‍ ആറു മാസം തടവോ പിഴയോ രണ്ടില്‍ ഏതെങ്കിലുമൊന്നോ ശിക്ഷ ലഭിക്കാവുന്ന കുറ്റമാണിത്.

സമാന കേസില്‍ മാധ്യമ പ്രവര്‍ത്തകനും ജനം ടി.വി എഡിറ്ററുമായ അനില്‍ നമ്പ്യാര്‍ക്കെതിരെയും കേസ് രജിസ്റ്റര്‍ ചെയ്തിട്ടുണ്ട്.