ബന്തിയോട്: സ്വകാര്യ ബസ് തടഞ്ഞു നിര്‍ത്തി കാറിലെത്തിയ സംഘം ക്ലീനറെ അക്രമിച്ചു. അക്രമത്തില്‍ പരുക്കേറ്റ ബായാര്‍ ബെള്ളൂര്‍ സ്വദേശി യൂസഫി (22)നെ കുമ്പള സാമൂഹ്യാരോഗ്യ കേന്ദ്രത്തില്‍ പ്രവേശിപ്പിച്ചു. ഇന്നലെ രാവിലെ ഒന്‍പതു മണിയോടെ ബന്തിയോട് ബൈദളയിലാണ് സംഭവം.
പെര്‍മുദെയില്‍ നിന്നും യാത്രക്കാരുമായി കുമ്പള ഭാഗത്ത് വരുമ്പോള്‍ കാറിലും ബൈക്കിലുമായി എത്തിയ ഒരു സംഘമാണ് അക്രമിച്ചത്.  
ബസ് പിന്തുടര്‍ന്ന് ബൈദളയില്‍ എത്തിയപ്പോള്‍ കാര്‍ ബസിനു കുറുകെ നിര്‍ത്തി ക്ലീനറെ വലിച്ചിറക്കി മര്‍ദ്ദിക്കുകയായിരുന്നു.
 സംഭവത്തില്‍ പ്രതിഷേധിച്ച് കാസര്‍കോട് ബന്തിയോട് - ധര്‍മ്മത്തടുക്ക റൂട്ടിലോടുന്ന അഞ്ചോളം ബസുകള്‍ സര്‍വീസ് നിര്‍ത്തിവച്ചു.
പിന്നീട് പൊലിസ് ഇടപെട്ട് ബസോട്ടം പുനരാരംഭിക്കുകയായിരുന്നു. അക്രമികളെ ഉടന്‍ പിടികൂടണമെന്ന് തൊഴിലാളികള്‍ ആവശ്യപ്പെട്ടു.