കാഞ്ഞങ്ങാട്: തെരുവ് നായയുടെ കടിയേറ്റ വിദ്യാര്‍ഥിയെ കാഞ്ഞങ്ങാട് ജില്ലാ ആശുപത്രിയില്‍ പ്രവേശിപ്പിച്ചു. മടിക്കൈ കക്കാട്ട് ഗവ. ഹയര്‍സെക്കന്‍ഡറി സ്‌കൂളിലെ വിദ്യാര്‍ഥിയും ലോറി ഡ്രൈവര്‍ തെക്കന്‍ ബങ്കളം പടിഞ്ഞാറെ വീട്ടില്‍ കെ.വി വിനുവിന്റെ മകനുമായ പി.വി ആദര്‍ശിനാണ് തെരുവ്‌നായയുടെ കടിയേറ്റത്. കഴിഞ്ഞ ദിവസം വൈകുന്നേരം സ്‌കൂള്‍ വിട്ട് വീട്ടിലേക്ക് പോവുകയായിരുന്ന ആദര്‍ശിന് നേരെ കുരച്ചുകൊണ്ട്  തെരുവ് നായ ചാടിവീഴുകയായിരുന്നു.
നായയുടെ അക്രമത്തില്‍  നിന്നും രക്ഷപ്പെടാന്‍ കുട്ടി ഓടിയെങ്കിലും കാലിടറി വീണ കുട്ടിയുടെ ദേഹത്തേക്ക് ചാടിയ നായ കടിച്ചുകീറി. നിലവിളി കേട്ട് പരിസരവാസികള്‍ വടിയുമായി എത്തിയതോടെ നായ ഇവര്‍ക്ക് നേരെയും തിരിഞ്ഞു. ഇതിനിടയില്‍ അടികിട്ടിയ നായ ഓടിമറയുകയായിരുന്നു. കക്കാട് ഭാഗത്ത് റോഡരികിലും മറ്റുമായി മാലിന്യങ്ങള്‍ തള്ളുന്നത് പതിവാണ്. ഇറച്ചി അവശിഷ്ടങ്ങളും മറ്റും തിന്ന് കൊഴുത്ത് ആക്രമണോല്‍സുകരായ നായ്ക്കളാണ് പ്രദേശത്ത് ഭീതി പരത്തുന്നത്.