ഇരിങ്ങാലക്കുട: സ്‌കൂള്‍ ഫുട്‌ബോള്‍ ടീമിന്റെ ജഴ്‌സിയില്‍ ചെഗുവേരയുടെ ചിത്രം പതിച്ചത് വിവാദത്തില്‍. എടതിരിഞ്ഞി എച്ച്.ഡി.പി സമാജം ഹയര്‍ സെക്കന്‍ഡറി സ്‌കൂളിലെ ഫുട്‌ബോള്‍ ടീമിന്റെ ജഴ്‌സിയിലാണ് ചിത്രം പതിച്ചത്. ഈ ജഴ്‌സിയണിഞ്ഞാണ് ക്രൈസ്റ്റ് കോളജില്‍ നടക്കുന്ന ഉപജില്ലാ ഫുട്‌ബോള്‍ മല്‍സരത്തില്‍ കുട്ടികള്‍ മല്‍സരിക്കാനിറങ്ങിയത്.

സംഭവത്തില്‍ പ്രതിഷേധിച്ച് ബി.ജെ.പിയും കോണ്‍ഗ്രസ്സും രംഗത്തെത്തി. കുട്ടികളെ രാഷ്ട്രീയ പ്രചാരണ ആയുധമാക്കുന്നതിന്റെ ഭാഗമാണിതെന്നും സ്‌കൂള്‍ മാനേജ്‌മെന്റിന്റെയും അധ്യാപകരുടെയും നടപടിയില്‍ രാഷ്ട്രീയ ഗൂഢാലോചനയുണ്ടെന്നും പടിയൂര്‍ കോണ്‍ഗ്രസ് മണ്ഡലം കമ്മിറ്റി ആരോപിച്ചു. സംഭവത്തില്‍ പ്രതിഷേധിച്ച് പോസ്റ്റ് ഓഫിസിനു മുമ്പില്‍ നിന്ന് സ്‌കൂള്‍ പരിസരത്തേക്ക് ബി.ജെ.പി പടിയൂര്‍ പഞ്ചായത്ത് കമ്മിറ്റി മാര്‍ച്ച് നടത്തി. സ്‌കൂളിലെ കായികമേള പോലും രാഷ്ട്രീയവല്‍ക്കരിക്കുന്നതിന്റെ ഭാഗമായാണ് ജഴ്‌സിയില്‍ ചെഗുവേരയുടെ ചിത്രം പതിക്കുന്നതെന്ന് ബി.ജി.പി കുറ്റപ്പെടുത്തി.