പെരുമ്പാവൂര്‍: ലോറി ഡ്രൈവറെ രണ്ടംഗ സംഘം റോഡില്‍ തടഞ്ഞ് നിര്‍ത്തി മര്‍ദിച്ചതായി പരാതി. കൊട്ടാരക്കാര മൈലം സ്വദേശി ഷിബു ഭവനില്‍ ഷിബു (28)നാണ് മര്‍ദനമേറ്റത്. ഇന്നലെ ഉച്ചയ്ക്ക് 2.30 ഓടെ പെരുമ്പാവൂര്‍ പാലക്കാട്ടുതാഴത്താണ് സംഭവം.
കാറിലെത്തിയ രണ്ടംഗ സംഘം ലോറി തടഞ്ഞ് നിര്‍ത്തിയ ശേഷം മര്‍ദ്ദിച്ചെന്നും പോക്കറ്റിലുണ്ടായിരുന്ന 4500 രൂപ പിടിച്ച് മേടിച്ച ശേഷം ലോറിയുടെ താക്കോല്‍ എറിഞ്ഞ് കളഞ്ഞതായും ഷിബു പെരുമ്പാവൂര്‍ പൊലീസിന് നല്‍കിയ പരാതിയില്‍ പറയുന്നു. സംഭവം നടക്കുമ്പോള്‍ നിരവധിപേര്‍ ഉണ്ടായിരുന്നെങ്കിലും ഇവര്‍ കാഴ്ച്ചക്കാരായി നോക്കി നില്‍ക്കുക മാത്രമാണ് ചെയ്‌തെന്നും ഷിബു പറഞ്ഞു.
തക്കാളിപ്പെട്ടി കൊണ്ടുപോകുന്നതിനായാണ് ഷിബു പെരുമ്പാവൂരിലെത്തിയത്. സംഭവശേഷം പുറകെ വന്ന കാര്‍ യാത്രികരാണ് ഷിബുവിനെ ആശുപത്രിയില്‍ പ്രവേശിപ്പിച്ചത്. വാഹനത്തിന് സൈഡ് കൊടുക്കാത്തതാണ് മര്‍ദ്ദനത്തില്‍ കലാശിക്കാന്‍ കാരണമായതെന്ന് പറയുന്നു. പരുക്കേറ്റ ഷിബു പെരുമ്പാവൂര്‍ താലൂക്ക് ആശുപത്രിയില്‍ ചികിത്സയിലാണ്. പൊലീസ് കേസെടുത്ത് അന്വേഷണം ആരംഭിച്ചു.