ലോകകപ്പ് സ്വപ്‌നങ്ങള്‍ അവസാനിപ്പിച്ച് ഖത്തറില്‍ നിന്ന് മടങ്ങുന്ന പോര്‍ച്ചുഗല്‍ സൂപ്പര്‍ താരം ക്രിസ്റ്റ്യാനോ റൊണാള്‍ഡോയെ ആശ്വസിപ്പിച്ച് ട്വിറ്ററില്‍ മനോഹരമായ കുറിപ്പെഴുതി ഇന്ത്യന്‍ ക്രിക്കറ്റര്‍ വിരാട് കോഹ്‌ലി. മൊറോക്കോയോട് ക്വാര്‍ട്ടര്‍ ഫൈനലില്‍ തോറ്റാണ് പോര്‍ച്ചുഗലിന്റെ മടക്കം. പോര്‍ച്ചുഗലിനായി ഇനി ഏഴാം നമ്പര്‍ ജഴ്‌സിയില്‍ ക്രിസ്റ്റ്യാനോയെ കാണാനാവുമോയെന്ന് ഉറപ്പില്ല.

ക്രിസ്റ്റിയാനോയുടെ ഏറ്റവും വലിയ ആരാധകരില്‍ ഒരാളാണ് വിരാട് കോഹ്‌ലി. ഫുട്‌ബോള്‍ എന്ന ഗെയിമിനും ലോകമെമ്പാടുമുള്ള ആരാധകര്‍ക്കും അദ്ദേഹം നല്‍കിയ സംഭാവനകള്‍ ഏതെങ്കിലും ട്രോഫിക്കോ കിരീടനേട്ടത്തിനോ ഇല്ലാതാക്കാന്‍ കഴിയുന്നതല്ലെന്ന് കോഹ്‌ലി ട്വിറ്ററില്‍ കുറിച്ചു. താങ്കള്‍ ഞാനടക്കമുള്ള കാണികളില്‍ ചെലുത്തിയ സ്വാധീനം ഒരു കിരീട നേട്ടത്തിനും വിശദീകരിക്കാനാവില്ല. നിങ്ങള്‍ കളിക്കുന്നത് ഞങ്ങള്‍ കാണുന്നുണ്ട്, അത് ദൈവത്തിന്റെ വരദാനമാണ്- കോഹ്‌ലി അഭിപ്രായപ്പെട്ടു.

ക്രിസ്റ്റിയാനോയുടെ കഠിനാധ്വാനത്തെയും അര്‍പ്പണബോധത്തെയും പ്രസംസിച്ച് മറ്റൊരു കുറിപ്പും കോഹ്‌ലി എഴുതി. അനുഗ്രഹീതനായ കളിക്കാരനാണെന്നും ഏതൊരു കായികതാരത്തിനും യഥാര്‍ത്ഥ പ്രചോദനമാണ് അദ്ദേഹമെന്നും തന്നെ സംബന്ധിച്ച് എക്കാലത്തെയും മികച്ച താരമാണ് ക്രിസ്റ്റിയാനോയെന്നും കോഹ്‌ലി ട്വിറ്ററില്‍ കുറിച്ചു.

അഞ്ചു തവണ ബാലണ്‍ ഡി ഓര്‍ പുരസ്‌കാരം നേടിയ ലോക ഫുട്‌ബോളിലെ എക്കാലത്തെയും മികച്ച താരങ്ങളിലൊരാളായ ക്രിസ്റ്റ്യാനോ അന്താരാഷ്ട്ര ഫുട്‌ബോളില്‍ നിന്ന് വിരമിക്കുമോയെന്ന കാര്യം ഇതുവരെ പ്രഖ്യാപിച്ചിട്ടില്ല. ലോകകപ്പില്‍ നിന്ന് പുറത്തായതിന് പിന്നാലെ, പോര്‍ച്ചുഗലിനായി ഒരു ലോകകപ്പ് നേടുക എന്ന കരിയറിലെ ഏറ്റവും വലിയ മോഹം അവസാനിച്ചതായി ക്രിസ്റ്റ്യാനോ ഇന്‍സ്റ്റാഗ്രാമില്‍ കുറിച്ചിരുന്നു. മാഞ്ചസ്റ്റര്‍ യുനൈറ്റഡുമായുള്ള കരാര്‍ അവസാനിപ്പിച്ച താരത്തിന് നിലവില്‍ ഒരു ക്ലബ്ബുമായും കറാറില്ല.