ദുബൈ: ഇന്ന് മുതല്‍ കുട്ടിക്രിക്കറ്റിന്റെ നാളുകള്‍. പാതിവഴിയില്‍ നിന്നുപോയ 14ാം സീസണ്‍ ഐ.പി.എല്ലിന് ഇന്ന് വീണ്ടും തുടക്കം. കുട്ടിക്രിക്കറ്റ് പൂരം ഐ.പി.എല്ലോടെ തുടങ്ങി ടി20 ലോകകപ്പോടെ അവസാനിക്കുമ്പോള്‍ അറേബ്യന്‍ മണ്ണില്‍ വെടിക്കെട്ടുകളുടെ വിസ്മയ രാവുകള്‍ പുനര്‍ജനിക്കും. ഇന്ന് രാത്രി 7.30ന് മുന്‍ ചാംപ്യന്‍മാരായ മുംബൈ ഇന്ത്യന്‍സും ചെന്നൈ സൂപ്പര്‍ കിങ്‌സും തമ്മില്‍ കൊമ്പുകോര്‍ക്കുന്നതോടെ സീസണിലെ രണ്ടാംഘട്ട മത്സരങ്ങള്‍ക്ക് തുടക്കമാവും. നേരത്തേ ഇന്ത്യയില്‍ വച്ച് ഐ.പി.എല്‍ തുടങ്ങിയെങ്കിലും കൊവിഡ്ബാധ റിപ്പോര്‍ട്ട് ചെയ്യപ്പെട്ടതോടെ മത്സരം മാറ്റിവയ്ക്കുകയായിരുന്നു. പിന്നീടുള്ള ചര്‍ച്ചകള്‍ക്കൊടുവില്‍ മത്സരം ഈ മാസം 19ന് യു.എ.ഇയില്‍ വച്ച് നടത്താന്‍ തീരുമാനമെടുക്കുകയും ചെയ്തു. പ്ലേ ഓഫും ഫൈനലും ഉള്‍പ്പെടെ ഇനി 31 മത്സരങ്ങളാണുള്ളത്. വിവിധ മാറ്റങ്ങളോടെയാണ് ഇത്തവണ ടീമുകളെത്തുന്നത്. പരുക്കും മറ്റു പ്രശ്‌നങ്ങളും കാരണം ചില പ്രധാന താരങ്ങള്‍ ഐ.പി.എല്ലില്‍നിന്ന് പിന്‍മാറി. ഇതിനു പകരം പുതിയ ആളുകളെ ടീമില്‍ ഉള്‍പ്പെടുത്തുകയും ചെയ്തു. രണ്ട് വര്‍ഷങ്ങള്‍ക്ക് ശേഷം മത്സരം നേരിട്ട് കാണാന്‍ കാണികളെത്തുന്നുവെന്ന പ്രത്യേകതയും സീസണിലെ ഐ.പി.എല്ലിനുണ്ട്.