ഹലാൽ രേഖപ്പെടുത്തിയ വസ്തുക്കൾ നിരോധിച്ച് ഉത്തർപ്രദേശ് സർക്കാർ

ലക്‌നോ: ഉത്പന്നങ്ങളിൽ ഹലാൽ സർട്ടിഫിക്കേഷൻ (മുദ്രണം) നിരോധിച്ച് ഉത്തർപ്രദേശ് സർക്കാർ ഉത്തരവിറക്കി. ഹലാൽ സർട്ടിഫിക്കേഷനുള്ള ഭക്ഷ്യ ഉത്പന്നങ്ങളുടെ ഉൽപ്പാദനം, സംഭരണം, വിതരണം, വിൽപ്പന എന്നിവ അടിയന്തര പ്രാബല്യത്തിൽ നിരോധിച്ചതായി സംസ്ഥാന സർക്കാർ അറിയിച്ചു. എന്നാൽ ഈ നിരോധനം കയറ്റുമതിക്കായി നിർമ്മിക്കുന്ന ഉൽപ്പന്നങ്ങൾക്ക് ബാധകമല്ല. ഭക്ഷ്യ വസ്തുക്കൾക്ക് പുറമെ മറ്റു വസ്തുക്കൾക്കും നിരോധനം ഉണ്ട്.

ഹലാൽ സാക്ഷ്യപ്പെടുത്തിയ മരുന്നുകൾ, മെഡിക്കൽ ഉപകരണങ്ങൾ, സൗന്ദര്യവർധക വസ്തുക്കൾ തുടങ്ങിയവയ്ക്കാണ് യോഗി ആദിത്യനാഥ്‌ സർക്കാർ നിരോധനം കൊണ്ടുവന്നത്. ഈ വസ്തുക്കളുടെയെല്ലാം ഉൽപാദനം, സംഭരണം, വിതരണം, വാങ്ങൽ, വിൽപന എന്നിവയിൽ ഏർപ്പെട്ടിരിക്കുന്ന ഏതൊരു വ്യക്തിക്കും സ്ഥാപനത്തിനും എതിരെ കർശനമായ നിയമ നടപടികൾ സ്വീകരിക്കുമെന്ന് സർക്കാർ പുറപ്പെടുവിച്ച ഉത്തരവിൽ പറയുന്നു.

ഭക്ഷ്യ ഉൽപന്നങ്ങളുടെ ഹലാൽ സർട്ടിഫിക്കേഷൻ ഒരു സമാന്തര സംവിധാനമാണെന്നും ഇത് ഭക്ഷ്യ വസ്തുക്കളുടെ ഗുണനിലവാരം സംബന്ധിച്ച് ആശയക്കുഴപ്പം സൃഷ്ടിക്കുന്നുവെന്നുമാണ് ഇക്കാര്യത്തിന് ബിജെപി സർക്കാർ നൽകുന്ന വിശദീകരണം. വ്യാജ ഹലാൽ സർട്ടിഫിക്കറ്റുകൾ നൽകി വിൽപ്പന വർധിപ്പിക്കാൻ ആളുകളുടെ മതവികാരം മുതലെടുത്തെന്ന് ആരോപിച്ച് ഒരു കമ്പനിക്കും മറ്റ് ചില സംഘടനകൾക്കുമെതിരെ പൊലിസ് കേസെടുത്തതിന് പിന്നാലെയാണ് നിരോധനം ഏർപ്പെ‌ടുത്തിയത്.