ബെഹ്‌റാംപൂര്‍: പശ്ചിമബംഗാളിലെ മുര്‍ഷിദാബാദ് ജില്ലയില്‍ ബെഹ്‌റാംപൂരില്‍ മെഡിക്കല്‍ കോളജ് ആശുപത്രിയിലുണ്ടായ തീപിടുത്തത്തില്‍ മൂന്നുപേര്‍ മരിച്ചു. 50 പേര്‍ക്ക് പരുക്കേറ്റു. ഇന്നലെ ഉച്ചയോടെയാണ് അപകടം.
ഒരു നഴ്‌സും രോഗിയോടൊപ്പം കൂട്ടിരിപ്പുകാരിയായ ഒരു സ്ത്രീയും ഒരു നവജാത ശിശുവുമാണ് മരിച്ചത്.  തീപിടുത്തമുണ്ടായതോടെ ആളുകള്‍ വെപ്രാളപ്പെട്ട് പുറത്തേക്കുകടക്കുന്നതിനിടെ തിക്കിലും തിരക്കിലും പുകയിലുംപെട്ടാണ് മരണമുണ്ടായത്. ആശുപത്രി കെട്ടിടത്തിന്റെ മൂന്നാം നിലയിലാണ് തീപിടുത്തമുണ്ടായത്.
ആശുപത്രിയിലെ ഒഴിഞ്ഞുകിടന്ന ഒരു വി.ഐ.പി കാബിനിലെ എ.സിയില്‍ നിന്നാണ് തീ പടര്‍ന്നതെന്നും റിപ്പോര്‍ട്ടുണ്ട്. അഗ്നിശമനസേന തീ പൂര്‍ണമായും നിയന്ത്രണവിധേയമാക്കി.
സ്ഥിതിഗതികള്‍ വിലയിരുത്താന്‍ ഉന്നതതല സംഘത്തെ മുഖ്യമന്ത്രി മമതാ ബാനര്‍ജി സംഭവസ്ഥലത്തേക്ക് അയച്ചു. വകുപ്പുതല അന്വേഷണത്തിനും ഉത്തരവിട്ടിട്ടുണ്ട്.