ട്രെൻഡായി ദുബൈ മെട്രോ ബ്ലൂ ലൈൻ; സ്റ്റേഷനുകളുടെ ചിത്രങ്ങൾ പുറത്ത്, സൗന്ദര്യത്തിൽ ദുബൈയെ തോൽപ്പിക്കാനാവില്ല

ദുബൈ: ദുബൈയിലെ ഇപ്പോഴത്തെ ഏറ്റവും ചൂടേറിയ ചർച്ചയാണ് ദുബൈ മെട്രോക്ക് പുതുതായി തുടങ്ങുന്ന ബ്ലൂ ലൈൻ ട്രാക്ക്. യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂം ആണ് ഇന്നലെ ബ്ലൂ ലൈനിന് അംഗീകാരം ലഭിച്ചതായി ഔദ്യോഗികമായി അറിയിച്ചത്. ഒമ്പത് എലവേറ്റഡ് സ്റ്റേഷനുകളും അഞ്ച് ഭൂഗർഭ സ്റ്റേഷനുകളും അടങ്ങുന്നതാണ് ബ്ലൂ ലൈൻ. ഈ സ്റ്റേഷനുകൾ എങ്ങനെയായിരിക്കുമെന്നുള്ള നിരവധി ചിത്രങ്ങൾ പുറത്തുവിട്ടിട്ടുണ്ട്.

മെട്രോ ബ്ലൂ ലൈൻ രണ്ട് പ്രധാന റൂട്ടുകൾ ആയാണ് നിർമിക്കുക. അൽ ജദ്ദാഫിൽ സ്ഥിതി ചെയ്യുന്ന ഗ്രീൻ ലൈനിലെ ക്രീക്ക് ഇന്റർചേഞ്ച് സ്റ്റേഷനിൽ നിന്നാണ് ആദ്യ റൂട്ട് ആരംഭിക്കുന്നത്. പിന്നീട് ദുബൈ ഫെസ്റ്റിവൽ സിറ്റി, ദുബൈ ക്രീക്ക് ഹാർബർ, റാസ് അൽ ഖോർ എന്നിവയിലൂടെ കടന്നുപോകുന്നു. തുടർന്ന് ഇന്റർചേഞ്ച് സ്റ്റേഷനുള്ള ദുബൈ ഇന്റർനാഷണൽ സിറ്റി 1-ൽ എത്തിച്ചേരും. അവിടെ നിന്ന് ദുബൈ ഇന്റർനാഷണൽ സിറ്റി 2, 3 എന്നിവയിലേക്ക് ഈ റൂട്ട് തുടരുന്നു. ദുബൈ സിലിക്കൺ ഒയാസിസ് വരെയും അക്കാദമിക് സിറ്റി വരെയും ഇവ നീളുന്നു. 21 കിലോമീറ്റർ ദൈർഘ്യമുള്ള ഈ ഭാഗം 10 സ്റ്റേഷനുകൾ ഉൾക്കൊള്ളുന്നു.

അൽ റാഷിദിയയിലെ റെഡ് ലൈനിലെ സെന്റർപോയിന്റ് ഇന്റർചേഞ്ച് സ്റ്റേഷനിൽ നിന്നാണ് ബ്ലൂ ലൈനിന്റെ രണ്ടാമത്തെ റൂട്ട് ആരംഭിക്കുന്നത്. ഇത് മിർദിഫ്, അൽ വർഖ എന്നിവയിലൂടെ കടന്നുപോകും. ദുബൈ ഇന്റർനാഷണൽ സിറ്റി 1 ഇന്റർചേഞ്ച് സ്റ്റേഷനിലാണ് ഇതിന്റെ എൻഡ് പോയിന്റ്. 9 കിലോമീറ്റർ നീളമുള്ള ഈ റൂട്ടിൽ നാല് സ്റ്റേഷനുകൾ ഉൾപ്പെടുന്നു. അൽ റുവയ്യ 3-ൽ മെട്രോ ഡിപ്പോയുടെ നിർമ്മാണവും പദ്ധതിയിൽ ഉൾപ്പെടുന്നു.

ദുബൈ ക്രീക്ക് ഹാർബറും ദുബൈ ഫെസ്റ്റിവൽ സിറ്റിയും, ഡ്രാഗൺ മാർട്ടിന്റെ ആസ്ഥാനമായ ദുബൈ ഇന്റർനാഷണൽ സിറ്റിയും വലിയ പാർപ്പിട സമുച്ചയങ്ങളും ബ്ലൂ ലൈൻ നൽകുന്ന പ്രധാന മേഖലകളിൽ ഉൾപ്പെടുന്നു.

2030 ഓടെ, പ്രതിദിനം 200,000 യാത്രക്കാർക്ക് സേവനം നൽകാനാണ് ബ്ലൂ ലൈൻ ലക്ഷ്യമിടുന്നത്. 2040 ഓടെ യാത്രക്കാരുടെ എണ്ണം 320,000 ആയി ഉയരുമെന്ന് പ്രതീക്ഷിക്കുന്നു. 2029 ആകുമ്പോഴേക്കും അക്കാദമിക് സിറ്റിയിൽ നിന്നുള്ള ഏകദേശം 50,000 യൂണിവേഴ്സിറ്റി വിദ്യാർഥികൾ ബ്ലൂ ലൈൻ ഉപയോഗിക്കുമെന്ന് പ്രതീക്ഷിക്കുന്നു

ബ്ലൂ ലൈൻ ദുബൈയുടെ റെയിൽവേ ശൃംഖല 131 കിലോമീറ്ററായി വികസിപ്പിക്കുന്നു. ഇതോടെ ആകെ 78 സ്റ്റേഷനുകളും 168 ട്രെയിനുകളും ദുബൈ മെട്രോയുടെ ഭാഗമാകും.