അബുദാബി: യുഎഇയുടെ 52ാം ദേശീയ ദിനം ആഘോഷങ്ങൾ പ്രമാണിച്ച് ഫുജൈറ പോലീസ് ട്രാഫിക് പിഴകളില്‍ 50 ശതമാനം ഇളവ് പ്രഖ്യാപിച്ചു. നവംബര്‍ 30 വ്യാഴാഴ്ച മുതല്‍ 52 ദിവസത്തേക്ക് പിഴത്തുക അടയ്ക്കുന്നവര്‍ക്ക് കിഴിവ് ലഭിക്കുന്നതാണ്.

നവംബര്‍ 30ന് മുമ്പ് ചുമത്തിയ ട്രാഫിക് പിഴകള്‍ക്ക് മാത്രമാണ് ഇളവ് ലഭിക്കുക. പുതുതായി ചുമത്തപ്പെടുന്ന പിഴകള്‍ക്ക് ഇത് ബാധകമല്ല. ഗുരുതരമായ ഗതാഗത നിയമലംഘനങ്ങള്‍ക്കുള്ള പിഴകള്‍ക്കും 50 ശതമാനം ഇളവ് ലഭിക്കില്ല.
ദേശീയ ദിന ഓഫറിലൂടെ ഡ്രൈവര്‍മാര്‍ക്ക് അവരുടെ ബ്ലാക്ക് പോയിന്റുകള്‍ റദ്ദാക്കാനും അവസരമുണ്ട്. പിഴ കുടിശ്ശികയുള്ളവര്‍ പരിമിത കാലത്തേക്ക് നല്‍കിയ ഡിസ്‌കൗണ്ട് ഓഫര്‍ പ്രയോജനപ്പെടുത്ത് അവ അടച്ചുതീര്‍ക്കണമെന്ന് ഫുജൈറ പോലീസിലെ ട്രാഫിക് ആന്‍ഡ് പട്രോള്‍ വിഭാഗം ഡയറക്ടര്‍ കേണല്‍ സാലിഹ് മുഹമ്മദ് അബ്ദുല്ല അല്‍ ദന്‍ഹാനി പൊതുജനങ്ങളോട് അഭ്യര്‍ത്ഥിച്ചു.

ഉമ്മുല്‍ ഖുവൈനിലും റാസല്‍ ഖൈമയിലും സമാനമായ ഡിസ്‌കൗണ്ട് പ്രഖ്യാപിച്ചിരുന്നു. ഉമ്മുല്‍ഖുവൈന്‍ എമിറേറ്റില്‍ ഇന്നു മുതല്‍ ജനുവരി ഏഴ് വരെ ട്രാഫിക് പിഴകള്‍ 50 ശതമാനം ഇളവോടെ അടച്ചുതീര്‍ക്കാനാവും. ചുവപ്പ് സിഗ്നല്‍ മറികടക്കല്‍ പോലുള്ള ഗുരുതര ഗതാഗത നിയമലംഘനങ്ങള്‍ക്ക് ഇളവില്ല. റാസല്‍ഖൈമയില്‍ പൊതുസേവന വകുപ്പ് ചുമത്തിയ പഴയ എല്ലാത്തരം പിഴകള്‍ക്കും 50 ശതമാനം ഇളവുണ്ട്. ഡിസംബര്‍ അവസാനിക്കുന്നതു വരെ തുക അടച്ചുതീര്‍ക്കാം.

ദുബൈ എമിറേറ്റ് ദേശീയദിനാഘോഷത്തിന്റെ ഭാഗമായി മൂന്നു ദിവസത്തേക്ക് പൊതുസ്ഥലങ്ങളിലെ പാര്‍ക്കിങ് ഫീസ് പൂര്‍ണമായി ഒഴിവാക്കി. നാളെ ദേശീയ ദിനം മുതല്‍ തിങ്കളാഴ്ച വരെയാണ് ആനുകൂല്യം. ഇതിനു പുറമേ ദുബൈ ഉള്‍പ്പെടെ രാജ്യത്തിന്റെ വിവിധ എമിറേറ്റുകളില്‍ നിന്നായി ഇത്തവണ 3,400ലധികം തടവുകാര്‍ക്ക് ദേശീയ ദിനത്തിന്റെ ഭാഗമായി പൊതുമാപ്പ് പ്രഖ്യാപിച്ചിട്ടുണ്ട്. നിരവധി പ്രവാസി ഇന്ത്യക്കാരും ഇതില്‍ ഉള്‍പ്പെടുന്നുണ്ട്.