ഷാര്‍ജ: സണ്‍റൈസേഴ്‌സിനെ കെട്ടുകെട്ടിച്ച് ചെന്നൈ. ഐ.പി.എല്ലിന്റെ ഈ സീസണില്‍ പ്ലേഓഫിലെത്തിയ ആദ്യത്തെ ടീമായി ധോണിയുടെ ചെന്നൈ സൂപ്പര്‍ കിങ്‌സ് മാറി. മുന്‍ ചാംപ്യന്‍മാര്‍ തമ്മിലുള്ള പോരാട്ടത്തില്‍ സണ്‍റൈസേഴ്‌സ് ഹൈദരാബാദിനെയാണ് ചെന്നൈ ഒതുക്കിയത്. ആറു വിക്കറ്റിന്റെ ജയവുമായാണ് സി.എസ്.കെ പ്ലേഓഫിലേക്കെത്തിയത്.

എന്നാല്‍ ഹൈദരാബാദ് ഈ സീസണില്‍ പ്ലേഓഫിലെത്താതെ പുറത്തായ ആദ്യ ടീമായി മാറി. ആദ്യം ബാറ്റ് ചെയ്ത ഹൈദരാബാദിനെ നിശ്ചിത ഓവറില്‍ ഏഴു വിക്കറ്റിന് 134 റണ്‍സിലൊതുക്കിയപ്പോള്‍ തന്നെ സിഎസ്‌കെ വിജയത്തിലേക്കു ആദ്യത്തെ ചുവടു വച്ചിരുന്നു.

ഓപ്പണിങ് ജോടികളായ ഫഫ് ഡുപ്ലെസിയും റുതുരാജ് ഗെയ്ക്വാദും ചേര്‍ന്ന് തകര്‍പ്പന്‍ തുടക്കവുമായി ചെന്നൈയുടെ വിജയത്തിന് അടിത്തറയിട്ടു. ഇതോടെ രണ്ടു ബോളുകള്‍ ബാക്കിനില്‍ക്കെ നാലു വിക്കറ്റിനു സിഎസ്‌കെ ലക്ഷ്യത്തിലെത്തുകയും ചെയ്തു.

ഓപ്പണറും വിക്കറ് കീപ്പറുമായ വൃധിമാന്‍ സാഹയ്ക്കു മാത്രമേ ഹൈദരാബാദ് നിരയില്‍ പിടിച്ചുനില്‍ക്കാനായുള്ളൂ. 44 റണ്‍സോടെയാണ് താരം ടീമിന്റെ ടോപ്‌സ്‌കോററായത്. 46 ബോളില്‍ രണ്ടു സിക്‌സറും ഒരു ബൗണ്ടറിയുമുള്‍പ്പെട്ടതാണ് താരത്തിന്റെ ഇന്നിങ്‌സ്.