കണ്ണൂര്‍: കെ.പി.സി.സി ഭാരവാഹിത്വ പട്ടികയില്‍ എല്ലാ വിഭാഗത്തിനും മതിയായ പ്രാതിനിധ്യം നല്‍കിയെന്ന് അധ്യക്ഷന്‍ കെ. സുധാകരന്‍. സമര്‍ഥരായ നേതാക്കളാണ് എല്ലാവരും. പാര്‍ട്ടിക്കകത്ത് അസംതൃപ്തി ഉള്ളവര്‍ ഉണ്ടാകാം. അവരെ പാര്‍ട്ടിയില്‍ മറ്റ് ഉത്തരവാദിത്വങ്ങള്‍ നല്‍കി സക്രിയമാക്കും. എന്നാല്‍ ഭാരവാഹികളുടെ എണ്ണം കുറച്ചതില്‍ ആരും തെരുവില്‍ ഇറങ്ങില്ല. പട്ടികയ്‌ക്കെതിരെ എതിര്‍പ്പുകള്‍ ഉണ്ടാകുമെന്നു കരുതുന്നില്ലെന്നും അദ്ദേഹം മാധ്യമപ്രവര്‍ത്തകരോടു പറഞ്ഞു.

കഴിവാണ് എല്ലാറ്റിനും മാനദണ്ഡം. ഗ്രൂപ്പില്‍ ഉള്ളവര്‍ തന്നെയാണു പട്ടികയിലുള്ളത്. സെക്രട്ടിമാരുടെ പട്ടികയില്‍ കൂടുതല്‍ സ്ത്രീ പ്രാതിനിധ്യമുണ്ട്. സ്ത്രീകള്‍ വൈസ് പ്രസിഡന്റുമാരായി വേണമെന്നു നിര്‍ബന്ധമില്ല. സാമുദായിക സംവരണം പൂര്‍ണമായും പാലിച്ചു. എല്ലാ വിഭാഗങ്ങള്‍ക്കും അവസരം നല്‍കി. ഉമ്മന്‍ചാണ്ടിയോടും രമേശ് ചെന്നിത്തലയോടും ചര്‍ച്ച നടത്തിയതാണു പട്ടിക തയാറാക്കിയത്. കെ.സി വേണുഗോപാല്‍ ലിസ്റ്റില്‍ ഇടപെട്ടില്ല. പട്ടികയില്‍ ഉള്‍പ്പെടാത്ത പാലക്കാട്ടെ മുതിര്‍ന്ന നേതാവ് എ.വി ഗോപിനാഥ് പാര്‍ട്ടിക്കൊപ്പം ഉണ്ടാകുമെന്നും കെ. സുധാകരന്‍ പറഞ്ഞു.