സുല്‍ത്താന്‍ ബത്തേരി: വയനാട്ടില്‍ മാലിന്യത്തിന് തീപിടിച്ച് സമീപത്ത് കിടന്നുറങ്ങിയിരുന്നയാൾ മരിച്ചു. സുല്‍ത്താന്‍ ബത്തേരി ചുള്ളിയോട് പണിയ കോളനി സ്വദേശി ഭാസ്‌കരനാണ് മരിച്ചത്. ചുള്ളിയോട് കാലിചന്തയിലാണ് തീപിടുത്തമുണ്ടായത്. ഭാസ്‌കരന്റെ മൃതദേഹം സുല്‍ത്താന്‍ ബത്തേരി ആശുപത്രി മോര്‍ച്ചറിയിലേക്ക് മാറ്റി.

ഹരിത കര്‍മ്മ സേന ചുള്ളിയോട് കാലിചന്തയിൽ സൂക്ഷിച്ചിരുന്ന മാലിന്യത്തിനാണ് തീ പിടിച്ചത്. ഇതിന് സമീപത്തുള്ള ഷെഡില്‍ കിടന്നുറങ്ങുകയായിരുന്നു ഭാസ്‌കരന്‍. തീ പടരുന്നത് കണ്ട് രക്ഷപ്പെടാന്‍ ശ്രമിക്കുന്നതിന് മുമ്പ് തീ ആളിപ്പടരുകയായിരുന്നു. തീ പിടുത്തമറിഞ്ഞെത്തിയ അഗ്നിശമന സേന തീ അണക്കുന്നതിനിടെയാണ് കത്തികരിഞ്ഞ നിലയില്‍ മൃതദേഹം കണ്ടെത്തിയത്.