■ പ്രഖ്യാപനം അടുത്തയാഴ്ച ഉണ്ടായേക്കും
തിരുവനന്തപുരം
ബസ് ചാർജ് മിനിമം 10 രൂപയാക്കാൻ സ്വകാര്യ ബസുടമകളുമായി മന്ത്രി നടത്തിയ ചർച്ചയിൽ ധാരണയിലെത്തിയതായി റിപ്പോർട്ട്.
ചാർജ് വർധനവിൻ്റെ കാര്യത്തിൽ ഗതാഗത മന്ത്രി ആൻ്റണി രാജുവിൻ്റെ ഭാഗത്തുനിന്നുണ്ടായ ഉറപ്പ് പരിഗണിച്ചാണ് സമരം തൽക്കാലത്തേക്ക് മാറ്റിവച്ചതെന്ന് ബസ് ഓണേഴ്സ് അസോസിയേഷൻ ഭാരവാഹികളിലൊരാൾ പറഞ്ഞു.
മിനിമം ചാർജ് 12 രൂപയാക്കണമെന്നായിരുന്നു ബസുടമകളുടെ ആവശ്യം. ഡീസൽ ലിറ്ററിന് 63 രൂപയായിരിക്കെ 2018ലാണ് മിനിമം ചാർജ് എട്ട് രൂപയാക്കിയത്.
ഇപ്പോൾ ഡീസൽ വില 100 രൂപയ്ക്ക് അടുത്തെത്തിയിട്ടും മിനിമം ചാർജ് കൂട്ടാത്തത് ബസ് വ്യവസായത്തെ തകർക്കുമെന്ന് ബസുടമകൾ വാദിച്ചതോടെയാണ് നിരക്ക് വർധന വാകാമെന്ന ധാരണയിൽ യോഗം പിരിഞ്ഞത്.
മിനിമം ചാർജ് 10 രൂപയാക്കുന്നതിൽ സർക്കാർ കാര്യമായ എതിർപ്പ് ഉന്നയിച്ചില്ലെങ്കിലും വിദ്യാർഥികളുടെ ടിക്കറ്റ് നിരക്ക് വർധിപ്പിക്കാനാവില്ലെന്ന് മന്ത്രി ഉറച്ച നിലപാടെടുത്തു. നിരക്ക് വർധനവ് സംബന്ധിച്ച് അടുത്തയാഴ്ച പ്രഖ്യാപനം ഉണ്ടാകുമെന്നാണ് സൂചന. അതേസമയം, നിരക്ക് വർധിപ്പിക്കുന്ന കാര്യത്തിൽ തീരുമാനമെടുക്കാൻ ഇന്നലെ ചേർന്ന ഇടതുമുന്നണി യോഗം മുഖ്യമന്ത്രിയെയും ഗതാഗതമന്ത്രിയെയും ചുമതലപ്പെടുത്തി.