തിരുവനന്തപുരം
മുല്ലപ്പെരിയാർ മരംമുറി വിവാദത്തിൽ പ്രതിരോധത്തിലായതോടെ തലയൂരാനുള്ള നീക്കം സംസ്ഥാന സർക്കാർ ഊർജിതമാക്കി. ഇതിന്റെ ഭാഗമായി സർക്കാർ അഡ്വക്കറ്റ് ജനറലിന്റെ (എ.ജി) നിയമോപദേശംതേടി. എ.ജിയുടെ അഭിപ്രായം അറിഞ്ഞ ശേഷമേ ഇക്കാര്യത്തിൽ സർക്കാരിന്റെ ഭാഗത്തുനിന്നുള്ള അടുത്ത നടപടിയുണ്ടാവൂ.ഉത്തരവ് റദ്ദാക്കാനാകുമോ എന്ന കാര്യത്തിലാണ് പ്രധാനമായും നിയമോപദേശം തേടിയത്. ഉത്തരവാദികൾക്കെതിരേ നടപടിയെടുക്കുമെന്ന് സർക്കാർ നിലപാടെടുത്തെങ്കിലും തുടർനീക്കങ്ങൾ വേണ്ടെന്നു വയ്ക്കുകയായിരുന്നു. ഉദ്യോഗസ്ഥർക്കെതിരായ നടപടിയുടെ കാര്യത്തിലും നിയമോപദേശം തേടി.നിലവിൽ ഉത്തരവിൽ ഒപ്പുവച്ച വൈൽഡ് ലൈഫ് വാർഡൻ ബെന്നിച്ചൻ തോമസാണ് പ്രതിസ്ഥാനത്തുള്ളത്. എന്നാൽ ബെന്നിച്ചനെതിരേ മാത്രം നടപടിയെടുത്താൽ പിന്നീട് വിഷയം കോടതിയിലെത്തിയാൽ തിരിച്ചടിയാവുമോ എന്ന ആശങ്ക സർക്കാരിനുണ്ട്. ഇതോടെയാണ് നിയമോപദേശം അടക്കമുള്ള കാര്യങ്ങളിലേക്ക് സർക്കാർ കടന്നത്.വിവാദ ഉത്തരവ് ഇറക്കിയ സംഭവത്തിൽ കുറ്റക്കാർക്കെതിരേ കർശന നടപടിയുണ്ടാവുമെന്ന് മന്ത്രി എ.കെ ശശീന്ദ്രൻ തിങ്കളാഴ്ച നിയമസഭയെ അറിയിച്ചിരുന്നു.