ബാസിത് ഹസൻ
തൊടുപുഴ
പുതുതലമുറ മാധ്യമങ്ങളുടെ സാധ്യതയും പ്രധാന്യവും തിരിച്ചറിഞ്ഞ് യൂട്യൂബ് ചാനലുമായി വൈദ്യുതി ബോർഡ്. ജീവനക്കാരുമായി കർമശേഷിയും കാര്യപ്രാപ്തിയും വർധിപ്പിക്കാൻ ലക്ഷ്യമിട്ട് ''''പവർ വോയ്സ്'''' എന്ന പേരിലാണ് യൂട്യൂബ് ചാനൽ തുടങ്ങുന്നത്. വൈദ്യുതി ബോർഡിൽ നടക്കുന്ന മാറ്റങ്ങളും പുരോഗതിയും സമയാസമയങ്ങളിൽ ജീവനക്കാരിൽ എത്തിക്കുകയാണ് ലക്ഷ്യം.

ജീവനക്കാരുടെ നൈപുണ്യവും കഴിവും പോഷിപ്പിക്കാൻ ഉതകുന്ന പരിശീലന വിഡിയോകൾ യൂട്യൂബിൽ അപ് ലോഡ് ചെയ്യും. പ്രവർത്തനതലത്തിലെ പരിചയവും അനുഭവജ്ഞാനവും നൂതന ആശയങ്ങളും മുൻനിർത്തിയുള്ള വിഡിയോകൾ ജീവനക്കാർക്കും അപ് ലോഡ് ചെയ്യാം. ഉന്നതതലത്തിൽ സൂക്ഷ്മപരിശോധനയ്ക്ക് ശേഷമേ വിഡിയോ അപ് ലോഡ് ചെയ്യാൻ കഴിയൂ.

ജീവനക്കാർക്ക് പ്രചോദനം നൽകാൻ എല്ലാ മാസവും ആദ്യ ആഴ്ചയിൽ സി.എം.ഡി, ഡയരക്ടർമാർ, അല്ലെങ്കിൽ ചുമതലപ്പെടുത്തിയ ഉദ്യോഗസ്ഥൻ എന്നിവരിൽ ആരുടെയെങ്കിലും ചെറുപ്രഭാഷണങ്ങൾ അപ് ലോഡ് ചെയ്യും. 10 - 20 മിനിറ്റ് ദൈർഘ്യമുള്ള പരിശീലന വിഡിയോകളാണുണ്ടാകുക. ഓരോ ജീവനക്കാരനും ആഴ്ചയിൽ ഒരു വിഡിയോ എങ്കിലും കണ്ടിരിക്കണം. ഇത് ഉറപ്പുവരുത്തേണ്ട ചുമതല അക്കൗണ്ട് റെന്ററിങ് യൂനിറ്റ് മേധാവികൾക്കാണ്. ബോർഡിലെ ഹ്യൂമൻ റിസോഴ്സ് ഇൻഫർമേഷൻ സിസ്റ്റവുമായി ബന്ധപ്പെടുത്തി പരിശീലന ആപ്ലിക്കേഷൻ സോഫ്റ്റ് വെയർ വികസിപ്പിക്കും.

വിഡിയോകൾക്ക് പ്രസക്തമായ വിഷയങ്ങൾ പെറ്റാർക്ക് പോലുള്ള പരിശീലന കേന്ദ്രങ്ങളുടെ സഹായത്തോടെയാണ് തെരഞ്ഞെടുക്കുക. ചീഫ് എൻജിനീയർ (എച്ച്.ആർ.എം), ചീഫ് പേഴ്സണൽ ഓഫിസർ, ചീഫ് പബ്ലിക് റിലേഷൻസ് ഓഫിസർ, പെറ്റാർക്ക്, എച്ച്.ആർ.എം ഡെപ്യൂട്ടി ചീഫ് എൻജിനീയർമാർ തുടങ്ങിയവരെ ഉൾപ്പെടുത്തി സ്ക്രീനിങ് പാനൽ രൂപീകരിക്കും.