ന്യൂഡൽഹി
കോടതിയലക്ഷ്യ നടപടി സ്വീകരിക്കുമെന്ന സുപ്രിംകോടതിയുടെ മുന്നറിയിപ്പിനെത്തുടർന്ന് സൈന്യത്തിൽ 11 വനിതകൾക്ക് കൂടി 10 ദിവസത്തിനുള്ളിൽ സ്ഥിരം കമ്മിഷൻ പദവി നൽകാമെന്ന് സൈന്യം. ബാക്കി യോഗ്യരായവർക്കെല്ലാം മൂന്നാഴ്ചയ്ക്കുള്ളിൽ പദവി നൽകണമെന്ന ഉത്തരവ് പാലിക്കുമെന്നും സൈന്യം അറിയിച്ചു. ഇതു സംബന്ധിച്ച ഉത്തരവ് ഉടനുണ്ടാകുമെന്ന് സൈന്യത്തിന് വേണ്ടി ഹാജരായ അഡീഷണൽ സോളിസിറ്റർ ജനറൽ സഞ് ജയ് ജെയ്ൻ ജസ്റ്റിസുമാരായ ഡി.വൈ ചന്ദ്രചൂഡ്, എ.എസ് ബൊപ്പണ്ണ എന്നിവരുടെ ബെഞ്ച് മുമ്പാകെ ബോധിപ്പിച്ചു.
ഈ മാസം ഒന്നിന് മുമ്പ് 39 വനിതാ ഉദ്യോഗസ്ഥർക്ക് സ്ഥിരം കമ്മിഷൻ പദവി നൽകാൻ ഒക്ടോബർ 22ന് സുപ്രിംകോടതി നിർദേശിച്ചിരുന്നു. എന്നാൽ സൈന്യം ഉത്തരവ് പാലിച്ചിരുന്നില്ല. തുടർന്ന് ഇന്നലെ ശക്തമായ വിമർശനമാണ് കോടതി ഉന്നയിച്ചത്. സൈന്യത്തിനെതിരേ കോടതിയലക്ഷ്യ നടപടി തുടങ്ങാൻ പോകുകയാണെന്ന് ജസ്റ്റിസ് ചന്ദ്രചൂഡ് പറഞ്ഞു. സൈന്യം അതിന്റെ മേഖലയിൽ പരമാധികാരമുള്ളതായിരിക്കാം, എന്നാൽ ഭരണഘടനാ കോടതിയും അതിന്റെ അധികാരപരിധിക്കുള്ളിൽ പരമോന്നതമാണെന്നും കോടതി ഓർമിപ്പിച്ചു.
സ്ഥിരം കമ്മിഷൻ പദവി നിഷേധിക്കപ്പെട്ട 71 വനിതാ ഷോട്ട് സർവിസ് കമ്മിഷൻ ഉദ്യോഗസ്ഥരാണ് സുപ്രിംകോടതിയെ സമീപിച്ചത്.