കോഴിക്കോട്: മൂന്നു ദിവസങ്ങളിലായി കോഴിക്കോട് മെഡിക്കല്‍ കോളജ് ഗ്രൗണ്ടില്‍ നടന്ന സംസ്ഥാന ബധിര കായിക മേള സമാപിച്ചു. 170 പോയിന്റുമായി എറണാകുളം ജില്ല ചാംപ്യന്‍മാരായി. 152.50 പോയിന്റുമായി കോട്ടയം രണ്ടാം സ്ഥാനത്തും, 110.50 പോയിന്റുമായി കോഴിക്കോട് മൂന്നാം സ്ഥാനത്തുമെത്തി. 26നു തുടങ്ങിയ കായിക മേളയില്‍ വിവിധ ജില്ലകളില്‍ നിന്നായി ആയിരത്തോളം കായിക പ്രതിഭകള്‍ പങ്കെടുത്തു.  
സമാപന സമ്മേളന ഉദ്ഘാടനവും വിജയികള്‍ക്കുള്ള ട്രോഫി വിതരണവും സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍ നിര്‍വഹിച്ചു. ബധിര കായിക താരങ്ങള്‍ക്ക് സ്‌പോര്‍ട്‌സ് കൗണ്‍സില്‍ അംഗീകാരം നല്‍കുന്ന കാര്യം പരിഗണിക്കുമെന്ന് അദ്ദേഹം പറഞ്ഞു.
 സര്‍ക്കാര്‍ സഹായത്തോടെ പ്രത്യേക കായിക മേള നടത്താനാവശ്യമായ തുടര്‍നടപടികള്‍ സ്വീകരിക്കുമെന്നും അദ്ദേഹം വ്യക്തമാക്കി. കോഴിക്കോട് ജില്ലാ സ്‌പോര്‍ട്‌സ്  കൗണ്‍സില്‍ പ്രസിഡന്റ് ഡോ.കെ കുഞ്ഞാലി അധ്യക്ഷനായി. വി.കെ തങ്കച്ചന്‍, ടി.എം ആബിദ് റഹ്മാന്‍, വി.എം മോഹനന്‍, വാള്‍ട്ടര്‍ ഫെര്‍ണാണ്ടസ്, എന്‍ വിജയകുമാര്‍, ലോറന്‍സ് സംസാരിച്ചു.