സ്വന്തം ലേഖകൻ
കോഴിക്കോട്
വഖ്ഫ് നിയമനങ്ങൾ പി.എസ്.സിക്ക് വിട്ട സംഭവത്തിൽ ഐ.എൻ.എല്ലിന്റെ സർക്കാർ അനുകൂല നിലപാടിൽ വ്യാപക പ്രതിഷേധം. ഇന്നലെ മന്ത്രി അഹ് മദ് ദേവർകോവിലടക്കം വിഷയത്തിൽ സർക്കാർ അനുകൂല നിലപാടെടുത്തതോടെയാണ് മുസ് ലിം സംഘടനകൾക്കിടയിൽനിന്ന് പ്രതിഷേധം ശക്തമായത്.
വഖ്ഫ് വിഷയം മുസ് ലിം ലീഗ് വർഗീയവത്കരിക്കുകയാണെന്നാണ് ഇന്നലെ പാർട്ടി ദേശീയ നേതാവ് കൂടിയായ മന്ത്രി അഹ് മദ് ദേവർകോവിൽ പ്രതികരിച്ചത്. ലീഗിന്റെ കച്ചവട-സങ്കുചിത താൽപര്യങ്ങളാണ് പ്രചാരണത്തിന് പിന്നിൽ. വഖ്ഫ് നിയമനം പി.എസ്.എസിക്ക് വിട്ടാൽ അവിശ്വാസികൾ വഖ്ഫ് ബോർഡ് ഉദ്യോഗം കൈയടക്കുമെന്ന ചിലരുടെ വാദം ബാലിശമാണ്. ചിലർ പ്രചരിപ്പിക്കുംവിധം ദേവസ്വം ബോർഡ് പോലെയല്ല വഖ്ഫ് ബോർഡ്. ദേവസ്വം ബോർഡിന്റെയും വഖ്ഫ് ബോർഡിന്റെയും ഭരണനിർവഹണ രീതികൾ വ്യത്യസ്തമാണ്. ആ രീതി കൊണ്ടുവന്നാൽ പള്ളികൾ പിണറായി സർക്കാർ പിടിച്ചെടുക്കുന്നുവെന്ന വാദവുമായി ഇപ്പോൾ പ്രതിഷേധിക്കുന്നവർ തന്നെ രംഗത്തുവരും തുടങ്ങി വിഷയത്തിൽ പ്രതികരിച്ച സമുദായ സംഘടനകൾക്കെതിരേയും മുസ് ലിം ലീഗിനെതിരേയും രൂക്ഷമായ വിമർശനമാണ് മന്ത്രി ഉന്നയിച്ചിരിക്കുന്നത്.

സർക്കാർ നടപടിയെ മുസ്‌ലിം ലീഗ് വർഗീയവത്കരിക്കുകയാണെന്നും രാഷ്ട്രീയമാണ് ലീഗിന്റെ ലക്ഷ്യമെന്നുമാണ് സംസ്ഥാന പ്രസിഡന്റ് എ.പി അബ്ദുൽ വഹാബ് ഇതു സംബന്ധിച്ച് നടത്തിയ പ്രസ്താവന. സമുദായത്തെ തെറ്റിദ്ധരിപ്പിക്കാൻ മുസ്‌ലിം ലീഗ് ശ്രമിക്കുകയാണെന്നായിരുന്നു സംസ്ഥാന ജനറൽ സെക്രട്ടറി കാസിം ഇരിക്കൂർ കഴിഞ്ഞ ദിവസം ഇതു സംബന്ധിച്ച് പ്രതികരിച്ചത്. അതേസമയം, ഇടതു മുന്നണിയിൽ മുസ് ലിം സമുദായത്തിന്റെ പേരിൽ ആനുകൂല്യങ്ങൾ കൈപ്പറ്റുമ്പോൾ തന്നെ സമുദായത്തിനെതിരേയുള്ള സർക്കാർ നിലപാടുകളിൽ ഐ.എൻ.എൽ നേതാക്കളുടെ പരസ്യപ്രതികരണങ്ങൾക്കെതിരേ പാർട്ടിയിലെ ഒരു വിഭാഗവും അമർഷവുമായി രംഗത്തെത്തിയിട്ടുണ്ട്. സ്‌കോളർഷിപ്പ് അനുപാത വിഷയത്തിലടക്കം ഐ.എൻ.എൽ നിലപാടിനെതിരേ പാർട്ടിയിൽനിന്നു തന്നെ വിമർശനമുയർന്നിരുന്നു.