വടകര: അഴിയൂര്‍ പഞ്ചായത്തിലെ മുക്കാളി ടൗണില്‍ കടകള്‍ കുത്തിത്തുറന്നു മോഷണം. പണം, ഇലക്ട്രോണിക്‌സ് ഉപകരണങ്ങള്‍, സ്വര്‍ണം എന്നിവ കവര്‍ന്നിട്ടുണ്ട്.
ചോമ്പാല്‍ സുരഭിയില്‍ സന്തോഷിന്റെ ഉടമസ്ഥതയിലുള്ള അക്ഷയ സെന്റര്‍, രാജേന്ദ്രന്റെ ഉടമസ്ഥതയിലുള്ള അനുപമ ജ്വല്ലറിയുടെ നിര്‍മാണ കേന്ദ്രം, കൊളരാട് തെരു ആകാശിന്റെ ഉടമസ്ഥതയിലുള്ള സോളാര്‍ വാട്ടര്‍ ഹീറ്ററിന്റെ വില്‍പന കേന്ദ്രം എന്നിവിടങ്ങളിലാണ് ഇന്നലെ പുലര്‍ച്ചയ്ക്കു കവര്‍ച്ച നടന്നത്.
അക്ഷയ സെന്ററില്‍ നിന്ന് 25,000 രൂപയും ലാപ്‌ടോപുമാണു നഷ്ടപ്പെട്ടത്. ആഭരണ നിര്‍മാണശാലയില്‍ നിന്ന് 20 ഗ്രാം സ്വര്‍ണവും 500 രൂപയും, സോളാര്‍ വാട്ടര്‍ ഹീറ്റര്‍ വില്‍പന കേന്ദ്രത്തില്‍ നിന്ന് ഇലക്ട്രോണിക്‌സ് ഉപകരണങ്ങളുമാണു നഷ്ടപ്പെട്ടത്. തൊട്ടടുത്ത മൂന്നു സ്ഥാപനങ്ങളുടെയും ഷട്ടറിന്റെ പൂട്ട് തകര്‍ത്താണു മോഷ്ടാവ് അകത്തുകടന്നത്. ചോമ്പാല്‍ പൊലിസ് സ്ഥലത്തെത്തി പരിശോധന നടത്തി അന്വേഷണമാരംഭിച്ചു.