തിരുവനന്തപുരം: ശബരിമലയില്‍ ഭക്തജനങ്ങള്‍ക്ക് കൂടുതല്‍ ഇളവുകള്‍. എരുമേലി വഴിയുള്ള കാനനപാത തുറന്നുകൊടുക്കുകയും പ്രതിദിനം 60,000 പേര്‍ക്ക് പ്രവേശനം അനുവദിക്കുകയും ചെയ്യും. 50,000 പേര്‍ക്ക് വെര്‍ച്ചല്‍ ക്യൂ വഴിയും 10,000 പേര്‍ക്ക് സ്പോട്ട് ബുക്കിങ് വഴിയുമാണ് പ്രവേശനം നല്‍കുക.

നെയ്യഭിഷേകം മുമ്പുണ്ടായിരുന്ന പോലെ രാവിലെ ഏഴ് മുതല്‍ 12 വരെ നടത്താന്‍ അനുമതി നല്‍കും. കൊവിഡ് വ്യാപനത്തില്‍ കുറവ് വന്നതോടെ ശബരിമലയില്‍ സാധരണ നിലയിലുള്ള ദര്‍ശനം വേണമെന്ന് ദേവസ്വം ബോര്‍ഡും ഭക്തരും ആവശ്യമുന്നയിച്ചിരുന്നു. ഇത് പരിഗണിച്ചാണ് ഇളവുകള്‍ നല്‍കാന്‍ സര്‍ക്കാര്‍ തീരുമാനിച്ചത്. സന്നിധാനത്ത് വിരി വെക്കാനുള്ള സൗകര്യം നേരത്തെ നല്‍കിയിരുന്നു. അതേസമയം തുറന്നായ സ്ഥലത്ത് വിരിവെക്കുന്നതിനുള്ള നിയന്ത്രണം തുടരുകയാണ്.

നേരത്തെ നിയന്ത്രണങ്ങള്‍ പിന്‍വലിച്ചതോടെ നീലിമല വഴിയുളള പരമ്പരാഗത പാത സജീവമായിരുന്നു. ആശുപത്രി അടക്കമുള്ള സൗകര്യങ്ങള്‍ പാതയിലൂടെ യാത്ര ചെയ്യുന്നവര്‍ക്കായി ഒരുക്കിയിട്ടുണ്ട്.