ബിജെപി സ്ഥാനാര്‍ഥി അനില്‍ ആന്റണി കൈക്കൂലി വാങ്ങിയെന്ന ആരോപണത്തില്‍ തെളിവുകള്‍ പുറത്തുവിട്ട് ദല്ലാള്‍ നന്ദകുമാര്‍. ഇന്ന് രാവിലെ 11.30ന് ദില്ലിയിലാണ് അദ്ദേഹം മാധ്യമങ്ങളെ കണ്ടത്. യുപിഎ സര്‍ക്കാരിന്റെ ഭരണ കാലത്ത്  കേരള ഹൈക്കോടതിയിലെ സിബിഐ സ്റ്റാന്‍ഡിങ് കൗണ്‍സിലായി നിയമിക്കാമെന്ന വ്യാജേന സുഹൃത്തിനുവേണ്ടി തന്റെ കയ്യില്‍ നിന്നും അനില്‍ 25 ലക്ഷം രൂപ കൈക്കൂലി വാങ്ങിയെന്നായിരുന്നു നന്ദകുമാറിന്റെ ആരോപണം.

അനില്‍ ആന്റണി ആരോപണം നിഷേധിച്ചതോടെ കൂടുതല്‍ തെളിവുകളുമായി നന്ദകുമാര്‍ മുന്നോട്ടു വരികയായിരുന്നു. അനിലിന്റെ സര്‍വ്വ ഡീലുകളുടെയും രേഖകള്‍ പുറത്തുവരാനിരിക്കുന്നതേയുള്ളൂ എന്ന് നന്ദകുമാര്‍ പറഞ്ഞു. പണം നല്‍കിയ താനും അത് സ്വീകരിച്ച അനിലും തെറ്റുകാരാണ്. അത് നിയമത്തിനു മുന്നില്‍ താന്‍ തെളിയിക്കും. പണം കൈമാറി എന്ന് പറയപ്പെടുന്ന സാഗര്‍ രത്‌ന ഹോട്ടലിനു മുന്‍പില്‍ ദുബായ് ഡ്യൂട്ടി പെയ്ഡിന്റെ കവറുമായി നില്‍ക്കുന്നതിന്റെ ഫോട്ടോകളാണ് മാധ്യമങ്ങള്‍ക്കു മുന്നില്‍ തെളിവായി നന്ദകുമാര്‍ ഉയര്‍ത്തിക്കാട്ടിയത്. ഒപ്പം നരേന്ദ്ര മോദിയുമായി അനില്‍ ആന്റണി, ആന്‍ഡ്രൂസ് ആന്റണി എന്നിവര്‍ നില്‍ക്കുന്ന ചിത്രവും അദ്ദേഹം പുറത്തുവിട്ടു. അനില്‍ നന്ദകുമാറിനെ വിളിച്ച ഫോണ്‍ നമ്പറും പുറത്തുവിട്ട തെളിവുകളില്‍ ഉള്‍പ്പെടുന്നു.

ഇപ്പോള്‍ അനില്‍ എന്‍ഡിഎയ്‌ക്കൊപ്പമാണെങ്കില്‍ വരുന്ന തിരഞ്ഞെടുപ്പില്‍ ഇന്ത്യ മുന്നണി അധികാരത്തിലെത്തുകയാണെങ്കില്‍ അവര്‍ക്കൊപ്പം പോകുമെന്നും നന്ദകുമാര്‍ പരിഹസിച്ചു. തെരഞ്ഞെടുപ്പിനുശേഷം മറ്റു തെളിവുകള്‍ പുറത്തു വിടുമെന്നാണ് നന്ദകുമാര്‍ പറയുന്നത്. തന്നെ അറിയില്ലെന്ന് അനില്‍ ആന്റണി എവിടെയും പറഞ്ഞിട്ടില്ലെന്നും ദല്ലാള്‍ നന്ദകുമാര്‍ ചൂണ്ടിക്കാട്ടി. യുപിഎ സര്‍ക്കാരിനെ കാലത്ത് പ്രതിരോധ രേഖകള്‍ വിറ്റ് അനില്‍ അനധികൃതമായി പണം കൈപ്പറ്റിയിട്ടുണ്ടെന്ന ആരോപണവും അടുത്തകാലത്ത് ഉയര്‍ന്നുവന്നിരുന്നു.