ന്യൂഡല്‍ഹി: പ്രഥമ ഐ.എസ്.എല്ലില്‍ ഡല്‍ഹി ഡൈനാമോസിന്റെ താരമായിരുന്ന മുന്‍ ചെല്‍സി അറ്റാക്കിങ് മിഡ്ഫീല്‍ഡര്‍ ഫ്‌ളോറന്റ് മലൂദ തിരിച്ചെത്തുന്നു. താരവുമായി കരാര്‍ പുതുക്കിയതായി ഡല്‍ഹി ഡൈനാമോസ് ഔദ്യോഗിക വൃത്തങ്ങള്‍ അറിയിച്ചു. ഡല്‍ഹിയുടെ മാര്‍ക്വീ താരമായിരിക്കും മലൂദ. ആദ്യ സീസണില്‍ ഡല്‍ഹിക്കു വേണ്ടിയിറങ്ങിയ മലൂദ പിന്നീട് ലോണടിസ്ഥാനത്തില്‍ ഈജിപ്ത് ക്ലബായ വാദി ദല്‍ഗയില്‍ കളിക്കുകയായിരുന്നു.
2012ല്‍ ചെല്‍സി യുവേഫ ചാംപ്യന്‍സ് ലീഗ് നേടിയപ്പോള്‍ ഈ ഫ്രഞ്ച് താരം ആദ്യ ഇലവനില്‍ ഉണ്ടായിരുന്നു. ഇംഗ്ലണ്ടില്‍ പരിശീലനം നടത്തുന്ന ഡല്‍ഹി ഡൈനാമോസിനൊപ്പം അടുത്ത ദിവസം മലൂദ ചേരും. പരിശീലനത്തിന്റെ ഭാഗമായി അടുത്ത ആഴ്ച ഇംഗ്ലീഷ് പ്രീമിയര്‍ ലീഗ് ക്ലബായ വെസ്റ്റ്‌ബ്രോംവിച്ച് ആല്‍ബിയോണുമായി ഡൈനാമോസ് ഏറ്റുമുട്ടും. ചെല്‍സിക്കു വേണ്ടി 149 കളികളില്‍ നിന്നായി 35 ഗോളുകള്‍ മലൂദ നേടിയിട്ടുണ്ട്.