ബംഗാള്‍ ഗവര്‍ണര്‍ ഡോ. സി.വി ആനന്ദ ബോസിനെതിരെ പീഡന പരാതി ഉന്നയിച്ച് രാജ്ഭവന്‍ ജീവനക്കാരി.കൊല്‍ക്കത്തയിലെ ഹരെ സ്ട്രീറ്റ് പൊലീസ് സ്റ്റേഷനിലാണ് ഇവര്‍ പരാതി നല്‍കിയിരിക്കുന്നത്. പരാതിയില്‍ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.രാജ്ഭവനിലെ പീസ് റൂമിന്റെ ചുമതലയിലുള്ള താല്‍ക്കാലിക ജീവനക്കാരിയാണു പരാതിയുമായി രംഗത്തെത്തിയിരിക്കുന്നത്. ഗവര്‍ണറെ നേരില്‍ കാണാന്‍ പോയ സമയത്തായിരുന്നു പീഡനം നടന്നതെന്നാണു പരാതിയില്‍ പറയുന്നത്. 

സ്ഥിരനിയമനം നല്‍കാമെന്നു പറഞ്ഞായിരുന്നു പീഡനമെന്നാണ് റിപ്പോര്‍ട്ട്. പീഡനം നടന്നയുടന്‍ അവര്‍ രാഭ്ജവന്‍ പരിധിയിലുള്ള പൊലീസില്‍ വിവരമറിയിച്ചു. തുടര്‍ന്ന് പൊലീസ് ഗവര്‍ണറുടെ വസതിയിലെത്തി ഇവടെ സ്റ്റേഷനിലെത്തിക്കുകയും പരാതി രേഖപ്പെടുത്തുകയുമായിരുന്നു. സംഭവം പുറത്തായതിനു പിന്നാലെ രാജ്ഭവനിലെ സുരക്ഷ ശക്തമാക്കിയിട്ടുണ്ട്.

പ്രധാനമന്ത്രി നരേന്ദ്ര മോദി ദ്വിദിന സന്ദര്‍ശനത്തിനായി ബംഗാളിലെത്തുന്നതിനു തൊട്ടുമുന്‍പാണ് ഗവര്‍ണര്‍ക്കെതിരെ ആരോപണമുയര്‍ന്നിരിക്കുന്നത്. മോദി എത്തുന്ന പശ്ചാത്തലത്തില്‍ കേരളത്തിലെ കുടുംബ സന്ദര്‍ശനം റദ്ദാക്കി ആനന്ദ ബോസ് കൊല്‍ക്കത്തയിലേക്കു മടങ്ങിയിട്ടുണ്ടെന്ന് വാര്‍ത്താ ഏജന്‍സിയായ പി.ടി.ഐ റിപ്പോര്‍ട്ട് ചെയ്യുന്നു.

1977 ബാച്ചില്‍ കേരള കേഡറിലെ ഐ.എ.എസ് ഓഫിസറായിരുന്നു മലയാളിയായ ആനന്ദ ബോസ്. നരേന്ദ്ര മോദിയുമായുള്ള കൂടിക്കാഴ്ചകള്‍ക്കു പിന്നാലെ 2019ലാണ് അദ്ദേഹം ബി.ജെ.പിയില്‍ ചേരുന്നത്. 2022ല്‍ നിലവിലെ ഉപരാഷ്ട്രപതി ജഗദീപ് ധന്‍ക്കഡിനു പകരക്കാരനായാണ് ബംഗാള്‍ ഗവര്‍ണറായി ചുമതലയേല്‍ക്കുന്നത്.