സംസ്ഥാനത്ത് നടപ്പിലാക്കാന്‍ തീരുമാനിച്ച ഡ്രൈവിങ് പരിഷ്‌കാരങ്ങളില്‍ മാറ്റം വരുത്താന്‍ ഗതാഗത വകുപ്പ്. ഇതുപ്രകാരം ഒരു ദിവസം 40 ടെസ്റ്റ് നടത്തും. 30 ടെസ്റ്റുകള്‍ നടത്തിയാല്‍ മതിയെന്നായിരുന്നു നേരത്തെയുണ്ടായിരുന്ന നിര്‍ദേശം. ഡ്രൈവിങ് ടെസ്റ്റിനുപയോഗിക്കുന്ന 15 വര്‍ഷം പഴക്കമുള്ള വാഹനങ്ങള്‍ മാറ്റാന്‍ ആറ് മാസത്തെ സാവകാശം നല്‍കി. ഇതിന് ശേഷം പുതിയത് വാങ്ങാനാണ് നിര്‍ദേശം.പരിഷ്‌കാരങ്ങള്‍ക്കെതിരെ ഡ്രൈവിങ് സ്‌കൂളുകാര്‍ കടുത്ത പ്രതിഷേധമുയര്‍ത്തിയതോടെയാണ് മാറ്റം വരുത്തിയിരിക്കുന്നത്.

വാഹനങ്ങളില്‍ കാമറ സ്ഥാപിക്കാനും ഇടതും വലതും ബ്രേക്കും ക്ലച്ചുമുള്ള വാഹനം മാറ്റാനും മൂന്ന് മാസത്തെ സാവകാശം കഴിഞ്ഞ ദിവസം അനുവദിച്ചിരുന്നു. ഈ നിര്‍ദേശങ്ങള്‍ ഉള്‍പ്പെടുത്തി പുതിയ ഉത്തരവിറങ്ങി.ഡ്രൈവിങ് ടെസ്റ്റ് പരിഷ്‌കരണവുമായി സര്‍ക്കാറിന് മുന്നോട്ടുപോകാമെന്ന് ഹൈകോടതി കഴിഞ്ഞ ദിവസം വ്യക്തമാക്കിയിരുന്നു. ട്രാന്‍സ്‌പോര്‍ട്ട് കമീഷണര്‍ ഇറക്കിയ സര്‍ക്കുലര്‍ ഹൈകോടതി ശരിവെച്ചിരുന്നു. പരിഷ്‌കരിച്ച ഡ്രൈവിങ് ടെസ്റ്റ് സര്‍ക്കുലര്‍ സ്റ്റേ ചെയ്യണമെന്ന ഡ്രൈവിങ് സ്‌കൂള്‍ ഉടമകളുടെ ആവശ്യമാണ് കോടതി തള്ളിയത്. എന്നാല്‍, പ്രതിഷേധം ശക്തമായതോടെയാണ് പരിഷ്‌കാരങ്ങളില്‍ ചെറിയ മാറ്റം വരുത്താന്‍ സര്‍ക്കാര്‍ തയാറായത്.